پہلی نیشنل ایجوکیشن کانفرنس کل ہو گی ،ماہرین تعلیمی اہداف کی راہ میں حائل رکاوٹوں کی نشاندہی اور حل پر تجاویز دیں گے:ڈاکٹر حسین قادری
لاہور (ڈیلی پاکستان آن لائن) پہلی نیشنل ایجوکیشن کانفرنس کل(ہفتہ) یکم فروری کو منہاج ایجوکیشن سوسائٹی کے زیرِ اہتمام لاہور میں ہوگی، کانفرنس میں ملک بھر سے ماہرین تعلیم شریک ہونگے۔
منہاج ایجوکیشن سوسائٹی کے چیئرمین پروفیسر ڈاکٹر حسین محی الدین قادری نے کانفرنس کا اعلان کرتے ہوئے کہا ہے کہ کانفرنس کا بنیادی مقصد تعلیمی نظام اور مطلوبہ نتائج کے درمیان حائل خلیج کی نشاندہی اور حل کے لیے تجاویز مرتب کرنا ہے۔ تعلیم کا بنیادی مقصد مثبت کردار اور فکر کے حامل افراد تیار کرنا ہے لیکن بدقسمتی سے ہمارا نظام تعلیم یہ ضرورت پوری نہیں کر رہا۔ تعلیمی ادارے بھی مطلوبہ معیار کے مطابق کردار ادا نہیں کر پا رہے ۔
انھوں نے کہا کہ تعلیم کا مقصدجدت اور تخلیقیت سےبھرپورایک ایسی نسل تیار کرنا ہے جو پاکستان سمیت دنیا بھر میں اُمت مسلمہ کی طرف سے اپنی صلاحیتوں کا لوہا منوا سکے۔ سکولز چل رہے ہیں،اساتذہ تنخواہیں اور مراعات بھی لے رہے ہیں، کتابیں خریدی اور بیچی جا رہی ہیں، ترقیاتی بجٹ رکھے اور استعمال ہو رہے ہیں، سکولز اور کلاس رومزکے اندر نصاب بھی پڑھایا جا رہا ہے لیکن اس ساری کاوشوں کے باوجود نتائج حاصل کیوں نہیں ہو رہے اور ایسا کیوں ہے؟یہی وہ چند سوالات ہیں جنھیں ’’ایم ای ایس ‘‘کے زیر اہتمام فرسٹ نیشنل ایجوکیشن کانفرنس میں ایڈریس کیا جائے گا ۔
انھوں نے کہا کہ سکولز کے پرنسپلز ،اونرز، پبلیشرزاور پبلکیشنزہاؤسنز کو دعوت دیتے ہیں کہ وہ درد مندی کے ساتھ اس کانفرنس میں شریک ہوں اور تعلیمی مسائل کے حل کے لیے تجاویز دیں۔
