حکومتی حراست سے2ہزار ساتھیوں کو چھڑانے کی منصوبہ بندی کر لی: طالبان کا دعویٰ
اسلام آباد(مانیٹرنگ ڈیسک) کالعدم تحریک طالبان پاکستان نے دعویٰ کیا ہے کہ انہوں نے حکومت کی حراست سے 2 ہزار ساتھیوں کو چھڑانے کی منصوبہ بندی کر لی ہے، ترجمان شاہد اللہ شاہد کا کہنا ہے کہ حکومت نے ہمارے خلوص کا جواب جعلی پولیس مقابلوں اور جیل میں قیدیوں کو قتل کر کے دیا ہے۔ میڈیا رپورٹس کے مطابق کالعدم تحریک طالبان کے ترجمان شاہد اللہ شاہد کا کہنا تھا کہ حکومت کی قید میں موجود 10,000 افراد کا طالبان سے کوئی تعلق نہیں، حکومت کی قید میں موجود 2,000 ساتھیوں کو چھڑانے کی منصوبہ بندی کر لی ہے، ہمارے ساتھ سیاست کرنے والوں کو الیکشن میں شکست اور جانی نقصان کا سامنا کرنا پڑا،ہم ملک میں امن کے لئے ہر قربانی دے سکتے ہیں، طالبان حکومت سے سنجیدہ مذاکرات اور آپریشن دونوں کے لئے تیار ہےں۔ نجی ٹی وی کے مطابق نامعلوم مقام سے ٹیلی فون پر گفتگو کرتے ہوئے شاہد اللہ شاہد نے کہا کہ آج کے طالبان 2007ءکے نہیں بلکہ 2014ءکے طالبان ہیں، کیونکہ آج ہمارے پاس اعلیٰ سے اعلیٰ سیاستدان، ماہرقانون دان، جرگہ ماہرین اور زندگی کے تمام شعبوں سے تعلق رکھنے والے افراد موجود ہیں اور ان کی مشاورت سے فیصلے کئے جاتے ہیں۔ ان کا کہنا تھا کہ جن لوگوں نے ہمارے ساتھ سیاست کی قوم نے ان کا حال بھی دیکھ لیا، انہیں جانی نقصان کے ساتھ ساتھ الیکشن میں بری طرح نقصان کا سامنا کرنا پڑا۔ ترجمان کا کہنا تھا کہ طالبان مذاکرات کے لئے مکمل طور پر سنجیدہ تھے اور اب بھی ہیں، لیکن افسوس کہ حکومت نے اس کے جواب میں ہمارے ساتھیوں کو جعلی مقابلوں اور جیلوں میں قتل کیا لیکن اس سب کے باوجود بھی ہم اپنے اعلان پر قائم رہے کیونکہ ہم ملک میں خون خرابہ نہیں چاہتے اور جو کارروائیاں ہم کر رہے ہیں وہ اقدامی کارروائیاں ہیں جن کا ہمیں بھر پور حق حاصل ہے۔ انہوں نے کہا کہ حکومت آئے دن جیٹ طیاروں کی بمباری میں بے گناہ لوگوں کو شہید کر رہی ہے۔ ایک سوال کے جواب میں شاہد اللہ شاہد نے کہا کہ حکومتی تحویل میں 10 ہزار سے زائد ایسے بندے ہیں جن کا طالبان سے کوئی تعلق نہیں جبکہ 2,000 کے قریب ہمارے ساتھی حکومتی قید میں ہیں جبکہ کئی ساتھیوں کو جعلی مقابلوں میں مار دیا گیا ہے۔انہوں نے کہا کہ حکومتی قید میں موجود طالبان ساتھیوں کی رہائی ہمارا فرض ہے اور اس کیلئے منصوبہ بندی کر لی گئی ہے۔ اگر حکومت آپریشن کا شوق رکھتی ہے تو ہم بھی جنگ کے لئے مکمل طور پر تیا ر ہیں۔
