امریکی خاتون کے معاملے پر نادیہ حسین کا ردِعمل سامنے آگیا
کراچی (ویب ڈیسک) پاکستان کی نامور ماڈل و اداکارہ نادیہ حسین نے امریکی شہری اونیجا اینڈریو رابنس کے معاملے پر گہری تشویش کا اظہار کیا ہے، نادیہ نے کہا کہ اونیجا کے ذہنی توازن پر سوال اٹھتے ہیں اور انہیں اس معاملے میں مدد کی ضرورت ہے۔ انہوں نے حکومت اور امریکی قونصلیٹ سے اپیل کی ہے کہ وہ اونیجا کو واپس امریکا بھیجنے میں مدد کریں۔
سوشل میڈیا پر ایک ویڈیو پیغام میں نادیہ حسین نے امریکی خاتون کے معاملے پر اپنی رائے دیتے ہوئے کہا ہے کہ اونیجا کی کہانی بہت افسوسناک ہے۔ انہوں نے کہا کہ اونیجا کو پاکستان میں تماشے کا نشانہ نہیں بنایا جانا چاہیے بلکہ انہیں جلد از جلد واپس امریکا بھیج دیا جانا چاہیے۔
اداکارہ نے کہا کہ اونیجا کا کوئی ٹھکانا نہیں ہے اور وہ بے گھر ہیں جو کہ کسی بھی انسان کے ساتھ ہونا انتہائی افسوسناک ہے۔ انہوں نے کہا کہ اس معاملے کو سیاسی یا سماجی فائدہ اٹھانے کےلیے استعمال نہیں کیا جانا چاہیے۔نادیہ نے اپنی بات کو مزید واضح کرتے ہوئے کہا کہ اونیجا کو پاکستان میں ایک انسان کی طرح عزت دی جانی چاہیے اور انہیں جلد از جلد ان کے گھر واپس بھیجا جانا چاہیے۔
نادیہ حسین کا یہ بیان سوشل میڈیا پر کافی پسند کیا جارہا ہے اور لوگ ان کی اس انسان دوست رویے کی تعریف کررہے ہیں۔
