دوسرا ٹی ٹوئنٹی ، پاکستان نے پاور پلے میں ہدف پورا کردیا ، زمبابوے کو عبرتناک شکست

بلاوایو(ڈیلی پاکستان آن لائن) ٹی ٹوئنٹی میچز کی سیریز کے دوسرے میچ میں پاکستان نے زمبابوے کو دس وکٹوں سے عبرتناک شکست دے دی ۔ پہلے پاکستانی باولرز نے اپنا جادو دکھا یا اور زمبابوے کی پوری ٹیم کو 57رنز پر پویلین بھیجا پھر پاکستانی اوپنرز نے دھواں دار بیٹنگ کر کے پاور پلے میں مطلوبہ ہدف حاصل کیا 

بلاوایو میں کھیلے جارہے میچ میں میزبان زمبابوے کے کپتان سکندر رضا نے ٹاس جیتا اور پہلے بیٹنگ کرنے کا فیصلہ کیا۔زمبابوے کا یہ فیصلہ بظاہر غلط ثابت ہوا، پاکستانی بولرز کے سامنے زمبابوے کی بیٹنگ لائن ریت کی دیوار ثابت ہوئی اور پوری ٹیم 12.4 اوورز میں 57  رنز پر ڈھیر ہوگئی۔زمبابوے کے 9 بیٹرز ڈبل فیگرز میں داخل نہ ہوسکے۔ برائن بینٹ 21 اور مارومانی 16 رنز کے ساتھ نمایاں رہے۔پاکستان کی جانب سے سفیان مقیم نے شاندار بولنگ کرتے ہوئے 3 رنز دے کر 5 کھلاڑیوں کو آؤٹ کیا۔اس کے علاوہ عباس آفریدی نے 2، ابرار احمد ، حارث رؤف اور سلمان علی آغا نے  ایک، ایک وکٹ لی۔

جواب میں پاکستان نے بغیر کسی وکٹ کے نقصان کے چھٹے اوور میں مطلوبہ ہدف حاصل کرلیا ۔ اوپنر عمیر یوسف 15گیندوں پر 22اور صائم ایوب 18گیندوں پر 36رنز بنا کر ناٹ آوٹ رہے