سندھ میں اومی کرون کے کیسز میں اضافہ ہو رہا ہے ،مرتضیٰ وہاب نے عوام کو خبردار کر دیا
کراچی ( ڈیلی پاکستان آن لائن) ایڈمنسٹریٹر کراچی مرتضیٰ وہاب نے عوام کو خبردار کرتے ہوئے کہا کہ سندھ میں اومی کرون کے کیسز میں اضافہ ہو رہا ہے ، عوام کو احتیاطی تدابیر اختیار کرنا ہوں گی ۔
کراچی میں میڈیا سے گفتگو کرتے ہوئے ایڈمنسٹریٹر کراچی نے کہا کہ چند ہفتوں میں اومی کرون کے باعث کورونا کے کیسز میں اضافہ ہوا ، فی الحال سندھ میں اومی کرون کی صورتحال کنٹرول میں ہے مگر عوام نے احتیاطی تدابیر اختیار نہ کیں تو حالات خراب ہو سکتے ہیں ، سندھ حکومت عوام پر کوئی سختی نہیں کرنا چاہتی ۔
مرتضیٰ وہاب نے کہا کہ وزیر اعلی سندھ نے آج کورونا سے متعلق اجلاس بلایا ہے ، عوامی محفوظ رہ کر ویکسی نیشن کرائیں اور انسداد کورونا میں حکومت کا ساتھ دیں ۔
ایڈمنسٹریٹر کراچی نے مزید کہا کہ پی ٹی آئی سرکاری ہسپتال نہیں چلا سکتی اس لئے قومی ہیلتھ کارڈ دیے ، قوی ہیلتھ کارڈ پی ٹی آئی کی ناکامی ہے ۔ ان کے دوستوں ، یاروں اور اے ٹی ایمز کے نجی ہسپتال ہیں ۔
