شارجہ میں مقیم بھارتی شہری نے 25 ملین درہم کی لاٹری جیت لی

شارجہ (ڈیلی پاکستان آن لائن)  متحدہ عرب امارات کے شہر شارجہ میں مقیم   بھارتی شہری  اروند اپوکٹّن نے 25 ملین درہم کا انعام جیت لیا۔ یہ انعام انہیں بگ ٹکٹ کی تازہ ترین قرعہ اندازی میں ٹکٹ نمبر 447363 کے ذریعے  منگل کے روز ملا۔

خلیج ٹائمز کے مطابق اروند شارجہ میں ایک سیلز پرسن کے طور پر کام کرتے ہیں۔ وہ  گزشتہ دو سال سے ٹکٹ خرید رہے تھے۔ ان کا کہنا ہے کہ  انہیں انعام کی توقع نہیں تھی، اور یہ انعام وہ 20 لوگوں کے ساتھ تقسیم کریں گے۔اروند نے کہا: "ابھی یہ بات سمجھنے میں وقت لگے گا، لیکن فی الحال، میں اس رقم کو دانشمندی سے استعمال کرنے کا منصوبہ بنا رہا ہوں ،  کچھ قرضوں کی ادائیگی کے لیے اور باقی رقم مستقبل کے لیے محفوظ رکھوں گا۔"

گرینڈ پرائز کے علاوہ، 'ڈریم کار' انعام کے فاتح کا اعلان بھی کیا گیا۔ سعودی عرب میں مقیم ایک بنگلہ دیشی شہری ہارون رشید  نے BMW 840I جیت لی، جس کا ٹکٹ نمبر 018422 تھا۔ مزید چار افراد نے بھی 'بِگ ون' مقابلے میں نقد انعامات جیتے۔ عبدالناصر، جو بھارت کی ریاست کیرالہ سے ہیں، نے ایک لاکھ درہم جیتے۔ ایم ڈی مہدی، جو ایک تعمیراتی کارکن ہیں، نے  50 ہزار  درہم جیتے، جو وہ 17 افراد کے ساتھ تقسیم کریں گے۔

آکاش راج، جو تین سال سے ٹکٹ خرید رہے ہیں اور کیرالہ کے رہائشی ہیں، نے 70 ہزار  درہم جیتے۔ اسی طرح، محمد حنیف جنہیں بگ ٹکٹ نے خصوصی طور پر قرعہ اندازی کے لیے مدعو کیا تھا، نے پہلے ایک باکس کھولا جس میں 30 ہزار درہم ظاہر ہوئے، لیکن دوبارہ کوشش کرنے پر انہوں نے 75 ہزار درہم جیت لیے۔