فیفا انٹرنیشنل فرینڈلی، پاکستان ویمنز فٹبال ٹیم سعودی عرب کے خلاف تیار

دوحہ(ڈیلی پاکستان آن لائن) پاکستان کی قومی ویمنز فٹبال ٹیم فیفا انٹرنیشنل فرینڈلی میچ کے لیے دوحہ پہنچ گئی اور بھرپور ٹریننگ کا آغاز کر دیا۔ اسپائر زون میں ہیڈ کوچ عدیل رزقی اور گول کیپر کوچ احسان اللہ کی زیر نگرانی ٹیم نے اپنی مہارت اور فٹنس کو بہتر بنانے پر کام کیا۔ٹیم کل بھی ٹریننگ کرے گی تاکہ 7 دسمبر کو سعودی عرب کے خلاف ہونے والے اہم میچ کے لیے مکمل تیاری کی جا سکے۔پاکستان اور سعودی عرب کے درمیان یہ میچ دوحہ کے اسپائر زون میں کھیلا جائے گا۔ یہ میچ پاکستانی وقت کے مطابق رات 9 بجے شروع ہوگا۔یہ میچ دونوں ممالک کی ویمنز فٹبال ٹیموں کے درمیان کھیل کے فروغ کے لیے اہم سمجھا جا رہا ہے۔ قومی ٹیم جیت کے لیے پرعزم ہے اور شائقین سے بھرپور حمایت کی امید کر رہی ہے۔