جو لوگ بے نظیر بھٹو اور مشرف کے نعرے لگاتے تھے آج عمران خان کے ساتھ کھڑے ہیں :چوہدری نثار
ٹیکسلا(ڈیلی پاکستان آن لائن)سابق وزیرداخلہ و رہنما پاکستان مسلم لیگ ن چوہدری نثار کا کہنا ہے کہ میں اللہ کے سوا کسی سے نہیں ڈرتا، مخالفین ہوں یا نوازشریف سب کے منہ پر بات کرتا ہوں،جو لوگ بے نظیربھٹو اور پرویز مشرف کے نعرے لگاتے تھے آج وہ عمران خان کے ساتھ کھڑے ہیں۔
ٹیکسلا میں کنونشن سے خطاب کرتے ہوئے سابق وزیرداخلہ چوہدری نثار کا کہنا تھا کہ میں نے ہمیشہ حق کی بات کی اور فخر ہے کہ حق بات کرنے والوں کے ساتھ کھڑا ہوں، میں صرف اللہ سے ڈرتا ہوں اور نوازشریف سمیت تمام سیاسی مخالفین کے منہ پر بات کرتا ہوں بلکہ ہرفورم پر سچی بات کرنے کا عادی ہوں۔ ان کا کہنا تھا کہ میں نے اپنی جماعت کے ساتھ ہمیشہ وفاداری کی لیکن کبھی کسی قبضہ گروپ کا ساتھ نہیں دیا اور آئندہ بھی اپنی اس عادت کو نہیں چھوڑ سکتا۔چوہدری نثارعلی نے کہا کہ مجھے اپنے حلقے کے عوام سے پیار ہے اور حلقے میں ہار یا جیت میرا مقدر بنے لیکن یہاں کے عوام کو کسی حالت نہیں چھوڑ سکتا، پاکستان کی تاریخ میں پہلی بار اپنے حلقے تک سوئی گیس پہنچائی، ہمارے مخالفین صرف باتیں کرتے ہیں عوام کی خدمت کرنا ان کے بس کی بات نہیں۔
