فرائض میں غفلت، ڈپٹی سپرنٹنڈنٹ ایگزیکٹو ڈسٹرکٹ جیل بھکر معطل
لاہور ( ڈیلی پاکستان آن لائن )وزیراعلی پنجاب کے وژن کے مطابق محکمہ داخلہ پنجاب میں میرٹ کی بالادستی کی احسن مثال، ناقص کارکردگی پر ڈپٹی سپرنٹنڈنٹ ایگزیکٹو ڈسٹرکٹ جیل بھکر طارق محمود کو معطل کر دیا گیا۔
محکمہ داخلہ پنجاب کے جاری کردہ آرڈرز کے مطابق ڈپٹی سپرنٹنڈنٹ جیل کو فرائض کی انجام دہی میں غفلت، نااہلی اور بدانتظامی پر معطل کیا گیا ہے۔ ترجمان محکمہ داخلہ پنجاب نے بتایا کہ سیکرٹری داخلہ کی ہدایت پر ایڈیشنل سیکرٹری داخلہ برائے پریزن عاصم رضا کی قیادت میں ٹیم مختلف جیلوں کی انسپکشن کر رہی ہے۔
محکمہ داخلہ پنجاب نے تمام جیلوں میں انتظام و انصرام کیلئے قواعد و ضوابط جاری کیے ہیں جن پر عملدرآمد کا جائزہ لینے کیلئے تمام جیلوں کی انسپکشن جاری ہے۔ ڈسٹرکٹ جیل بھکر میں ناقص انتظامات پر محکمہ داخلہ پنجاب نے معطلی کے احکامات جاری کرتے ہوئے متعلقہ افسر کو انسپکٹریٹ آف پریزن رپورٹ کرنے کا حکم دیا ہے۔
