کراچی میں گھریلو جھگڑے پر بھائی نے بھائی کو قتل کردیا

  کراچی(ڈیلی پاکستان آن لائن) گلشن معمار گبول گوٹھ ناز ہسپتال کے قریب گھر میں جھگڑے کے دوران بھائی نے بھائی کو تیز دھار آلے کے وار سے قتل کر دیا اور مقتول پولیس کا اہلکار تھا جبکہ ملزم موقع سے فرار ہوگیا۔

ایس ایچ او گلشن معمار عبدالغفار کورائی نے بتایا کہ مقتول کی شناخت 28 سالہ حسن ولد سہیل کے نام سے کی گئی ہے اور ابتدائی تحقیقات میں معلوم ہوا ہے کہ واقعہ گھر میں بھائیوں کے درمیان گھریلو جھگڑے کے دوران پیش آیا ہے۔انہوں نے کہا کہ بھائیوں کے درمیان گھریلو جھگڑے کے دوران مقتول کے بھائی علیان نے تیز دھار آلے سے گردن کے قریب وار کر کے بھائی کو قتل کر دیا۔ان کا کہنا تھا کہ مقتول پولیس اہلکار اور نیو کراچی صنعتی ایریا تھانے میں تعینات تھا جبکہ ملزم بھائی موقع سے فرار ہونے میں کامیاب ہوگیا جس کی تلاش جاری ہے۔پولیس نے مقتول کی لاش ضابطے کی کارروائی کے لیےعباسی شہید ہسپتال پہنچائی جسے بعدازاں ورثا کے حوالے کر دیا گیا۔