صدر مملکت ڈاکٹر عارف علوی سعودی عرب کے دورے پر مدینہ منورہ پہنچ گئے
ریاض(ڈیلی پاکستان آن لائن) صدر مملکت عارف علوی سعودی عرب کے دورے پر مدینہ منورہ پہنچ گئے، ایئرپورٹ پر ان کا شاندار استقبال کیا گیا۔
تفصیلات کے مطابق صدر مملکت مدینہ منورہ پہنچ چکے ہیں، ایئرپورٹ پر مدینہ کے ڈپٹی گورنر شہزادہ سعودبن خالدبن فیصل نے شاندار استقبال کیا۔اس موقع پر پاکستانی قونصل جنرل، قونصلیٹ افسران اور سعودی حکام بھی موجود تھے، ایئرپورٹ پر خوشگوار انداز میں سعودی رہنماؤں سے ملاقاتیں کی گئیں۔صدر عارف علوی روضہ رسول پر حاضری اور عمرہ ادا کریں گے۔
خیال رہے کہ رواں سال اکتوبر میں صدر مملکت ڈاکٹرعارف علوی رجب طیب اردگان کی دعوت پر ترکی کے تین روزہ دورے پر استنبول پہنچے تھے۔اپنے دورہ کے دوران صدر مملکت ترک ہم منصب طیب اردگان سمیت دیگر ممالک کی قیادتوں سے بھی ملاقاتیں کی تھیں۔
