ژوب میں مبینہ اغواء کار نے خود کو دھماکے سے اڑا لیا  

 ژوب(آئی این پی)بلوچستان کے ضلع ژوب میں مبینہ اغواء کار نے خود کو دھماکے سے اڑا لیا جب کہ قانون نافذ کرنے والے اداروں اور قبائلیوں سے فائرنگ کے تبادلے میں دیگر 2 اغواء کار بھی مارے گئے۔

اسسٹنٹ کمشنر ژوب محمد نوید عالم نے بتایا گذشتہ روز اغواء کاروں نے قلعہ سیف اللہ کے علاقے سے 2 افراد کو اغوا ءکیا تھا۔ لیویز فورس اور قبائلیوں نے اغواء کاروں کا تعاقب کیا، اس دوران ایک اغواء کار نے خود کو دھماکے سے اڑا لیا۔ اس دوران 2 اغواءکاروں کو ہلاک کردیا گیا جب کہ چوتھے اغواء کار کی تلاش جاری ہے۔انہوں نے کہا کہ کارروائی کے دوران ایک مغوی کو بازیاب کر الیا گیا جبکہ فائرنگ کے تبادلے میں دوسرا مغوی اغواءکاروں کی فائرنگ سے جاں بحق ہوگیا۔