پی ایس ایل 10 کا میدان سج گیا ، افتتاحی تقریب میں قومی فنکاروں کی شاندار پرفارمنس، عوام پر جوش
راولپنڈی (ڈیلی پاکستان آن لائن)پی ایس ایل 10 کا میدان سج گیا۔
تفصیلات کے مطابق پی ایس ایل 10 کی افتتاحی تقریب کا آغاز قومی ترانے سے ہوگیا۔ایچ بی ایل پاکستان سپر لیگ (پی ایس ایل) 10 کی افتتاحی تقریب کا آغاز راولپنڈی سٹیڈیم میں ہوا۔ افتتاحی تقریب میں جیٹ پروپلژن کا مظاہرہ کرنے والے فلائنگ مین نے پی ایس ایل 10 کی ٹرافی سی ای او پی ایس ایل سلمان نصیر کے سپرد کی جنہوں نے اس کو سٹیج پر سجایا۔تقریب میں میزبانی کے فرائض نامور پریزنٹر زینب عباس نے انجام دیئے۔ ترانے کے بعد اداکار حمزہ علی عباسی نے سٹیج پر گفتگو کی جس کے بعد معروف صوفی گلوکارہ عابدہ پروین نے اپنے فن کا مظاہرہ کیا۔
بعد ازاں تقریب میں شریک لوگ ینگ اسٹنرز کی پرفارمنس سے محظوظ ہوئے جس کے بعد مشہور پاپ گلوکار علی ظفر نے شاندار پرفارمنس پیش کرتے ہوئے ثقافت کی نمائندگی کرتے ہوئے سندھی، پنجابی، بلوچی اور پشتو میں گانے پیش کیے۔ علی ظفر، نتاشہ بیگ، ابرار الحق اور طلحہ انجم نے مل کر پی ایس ایل 10 کا اینتھم پیش کیا۔
