رمضان شوگر ملز ریفرنس واپس نیب کو بھجوانے کا عمل شروع
لاہور ( ڈیلی پاکستان آن لائن ) احتساب عدالت میں وزیر اعظم شہباز شریف اور حمزہ شہباز کیخلاف رمضان شوگر ملز ریفرنس واپس نیب کو بھجوانے کا عمل شروع ہوگیا۔
احتساب عدالت میں وزیر اعظم شہباز شریف اور حمزہ شہباز کیخلاف رمضان شوگر ملز ریفرنس پر ڈیوٹی جج زبیر شہزاد کیانی نے سماعت کی، شہباز شریف کی جگہ ان کے پلیڈر انوار حسین حاضری کیلئے پیش ہوئے۔
خیال رہے کہ عدالت نے وزیراعظم شہباز شریف کو حاضری سے مستقل استثنیٰ دے رکھا ہے۔
عدالت میں وکلاءنے موقف اختیار کیا کہ سپریم کورٹ نیب ترامیم بحالی کے فیصلہ کے بعد ریفرنس قابل سماعت نہیں، احتساب عدالت کو اس ریفرنس کی سماعت کا اختیار نہیں رہا۔
رمضان شوگر ملز ریفرنس کو واپس نیب کو بھجوانے کا عمل شروع ہو گیا ، عدالت نے ریمارکس دیئے کہ ملزمان رمضان شوگر ملز ریفرنس واپس نیب کو بھجوانے کیلئے درخواستیں دائر کریں، آئندہ سماعت پر ریفرنس واپس بھجوانے کی درخواستوں پر سماعت ہو گی۔
احتساب عدالت میں سابق وزیراعلیٰ پنجاب حمزہ شہباز کی ایک روزہ حاضری معافی کی درخواست دائر کی گئی جس کو عدالت نے منظور کرلیا۔
دائر درخواست میں وکلاءنے موقف اختیار کیا کہ حمزہ شہباز کمر کی تکلیف کے باعث پیش نہیں ہو سکتے ، ڈاکٹرز نے حمزہ شہباز کو بیڈ ریسٹ کا مشورہ دے رکھا ہے، حمزہ شہباز کا میڈیکل سرٹیفکیٹ بھی عدالت میں پیش کیا گیا۔
احتساب عدالت نے ریفرنس پر مزید سماعت یکم اکتوبر تک ملتوی کردی۔
