ایران میں 8 پاکستانیوں کے قتل پر پنجاب اسمبلی میں مذمتی قرارداد جمع
لاہور( ڈیلی پاکستان آن لائن ) ایران میں 8 پاکستانی مزدوروں کے بے دردی سے قتل کے خلاف پنجاب اسمبلی میں مذمتی قرارداد جمع کروائی گئی۔ یہ قرارداد مسلم لیگ (ن) کی رکن صوبائی اسمبلی حنا پرویز بٹ کی جانب سے پیش کی گئی۔
قرارداد کے متن میں کہا گیا ہے کہ یہ ایوان ایران میں پاکستانی مزدوروں کے قتل کی شدید الفاظ میں مذمت کرتا ہے۔ ایران کے صوبے سیستان میں 8 پاکستانی مزدوروں کو دہشت گردوں نے بے دردی سے قتل کیا، جن کا تعلق پنجاب سے تھا.
قرارداد میں کہا گیا ہے کہ دہشت گرد عناصر پاک ایران برادرانہ تعلقات کو سبوتاژ کرنا چاہتے ہیں، ایران پاکستان کا ہمسایہ اور اسلامی برادر ملک ہے، لہٰذا ایران حکومت فوری طور پر قاتلوں کو گرفتار کرے اور انہیں پاکستان کے حوالے کیا جائے تاکہ انصاف کے تقاضے پورے ہوں۔ قرارداد میں واقعے پر گہرے رنج و غم کا اظہار کرتے ہوئے جاں بحق مزدوروں کے اہل خانہ سے ہمدردی کا اظہار بھی کیا گیا ہے۔
