نوواک جوکووچ کو شکست:کارلوس الکاریز نے ومبلڈن چیمپئن شپ جیت لی

لندن (ڈیلی پاکستان آن لائن)سپین کے کارلوس الکاریز نے سربیا کے نوواک جوکووچ کو اسٹریٹ سیٹس میں ہراکر ومبلنڈن چیمپئن شپ کا فائنل جیت لیا۔

وملبڈن چیمپئن شپ کے مینز سنگلز کا فائنل سیکنڈ سیڈ سربیا کے نوواک جوکووچ اور دفاعی چیمپئن اسپین کے کارلوس الکاریز کے درمیان کھیلا گیا۔ابتدائی دو سیٹس میں 7 مرتبہ کے سابق چیمپئن نوواک جوکوچ کو کارلوس الکاریز نے مکمل آؤٹ کلاس کردیا۔ الکاریز نے پہلا اور دوسرا سیٹ 2-6، 2-6 سے جیت کر فائنل میں برتری حاصل کرلی۔

تیسرے سیٹ میں جوکووچ نے کچھ مزاحمت دکھائی، پانچ چار کے خسارے سے کم بیک کیا اور سیٹ برابر کرلیا لیکن ٹائی بریکر پر الکاریز نے سات ۔ چار سے تیسرا سیٹ بھی اپنے نام کیا۔

یوں سپین کے پلیئر نے یہ میچ 2-6، 2-6 اور 6-7 کے اسکور سے جیت کر مسلسل دوسری مرتبہ وملبڈن چیمپئن شپ کا ٹائٹل اپنے نام کیا۔