190ملین پاؤنڈ ریفرنس؛ بشریٰ بی بی کی حاضری سے استثنیٰ کی درخواست منظور،سماعت 18نومبر تک ملتوی
اسلام آباد(ڈیلی پاکستان آن لائن)احتساب عدالت نے 190ملین پاؤنڈ ریفرنس میں بشریٰ بی بی کی حاضری سے استثنیٰ کی درخواست منظور کرلی اور کیس کی سماعت 18نومبر تک ملتوی کردی۔
نجی ٹی وی چینل جیو نیوز کے مطابق اڈیالہ جیل میں 190ملین پاؤنڈ ریفرنس کی سماعت ہوئی،بانی پی ٹی آئی کو کمرہ عدالت میں پیش کیا گیا، احتساب عدالت کے جج ناصر جاوید رانا نے ریفرنس پر سماعت کی،بشریٰ بی بی کی جانب سے حاضری سے استثنیٰ کی درخواست منظور کر لی گئی۔
وکیل سلمان اکرم راجہ نے کہاکہ اسلام آباد ہائیکورٹ نے حکم دیا تھا کہ پہلے ملزمان کی بریت پر ٹرائل کورٹ فیصلہ کرے،احتساب عدالت نے کہاکہ اسلام آباد ہائیکورٹ سے ابھی تک کوئی حکم نامہ موصول نہیں ہوا، سلمان اکرم راجہ نے کہاکہ تحریری طور پر کہہ رہے ہیں کہ اسلام آباد ہائیکورٹ کی جانب سے حکم دیا گیا تھا، نیب نے کہاکہ جن وکلا نے اسلام آباد ہائیکورٹ میں دلائل دیئے انہی کی جانب سے تحریری طور پر آگاہ کیا جانا چاہئے تھا، اگر وکلا تحریری طور پر عدالت کو دے رہے ہیں تو عدالت اس معاملہ کو دیکھ لے، عدالت نے 190ملین پاؤنڈ ریفرنس پر سماعت 18نومبر تک ملتوی کردی ۔
