عمر اکمل میچ سے پہلے کس لیجنڈ کھلاڑی سے بات چیت کر رہے تھے؟ تصویر نے سوشل میڈیا پر دھوم مچا دی
دبئی (ڈیلی پاکستان آن لائن) پاکستان سپر لیگ (پی ایس ایل) کے چوتھے سیزن میں کوئٹہ گلیڈی ایٹرز نے اپنے پہلے میچ میں پشاور زلمی کو شکست دے کر فاتحانہ آغاز کیا ہے اور اس میچ کی سب سے قابل توجہ بات عمر اکمل کی بیٹنگ تھی جو ایک طویل عرصے بعد فارم میں نظر آئے اور اکیلے ہی اپنی ٹیم کو میچ جتوا دیا۔
پاکستانی شائقین کرکٹ ان کی کارکردگی پر حیران بھی ہیں اور خوش بھی کہ ایک وقت میں بہترین کھلاڑی کا لقب پانے والے عمر اکمل ایک مرتبہ پھر اپنی فارم میں واپس آ گئے ہیں اور اگر ان کی یہ کارکردگی برقرار رہی تو وہ وقت دور نہیں جب وہ قومی ٹیم میں بھی جگہ بنانے میں کامیاب ہو جائیں گے۔
اس کیساتھ ہی پاکستانی یہ بھی جاننا چاہتے ہیں کہ آخر ان کی اس فارم اور شاندار کارکردگی کے پیچھے چھپا راز کیا ہے؟ اس بارے میں ابھی کچھ کہنا قبل از وقت ہو گا مگر میچ سے قبل لی گئی ان ان کی ایک ایسی تصویر سامنے آ گئی ہے کہ دیکھ کر آپ بھی ان کی فارم کے پیچھے چھپی ایک وجہ ضرور جان جائیں گے۔
یہ تصویر کسی اور کیساتھ نہیں بلکہ سوئنگ کے سلطان اور کراچی کنگز کے صدر وسیم اکرم کیساتھ لی گئی جس میں دیکھا جا سکتا ہے کہ عمر اکمل نے پیڈ کر رکھے ہیں اور گلوز اور بلا ہاتھ میں پکڑے شائد بیٹنگ پریکٹس کیلئے گراﺅنڈ میں جانے کی تیاری میں ہیں اور وسیم اکرم انہیں کچھ بتا رہے ہیں۔ شائقین کرکٹ کا کہنا ہے کہ لگتا ہے وسیم اکرم کی جانب سے دی گئی ’ٹپس‘ عمر اکمل کے کام آ گئی ہیں جنہوں نے پی ایس ایل میں اپنے پہلے ہی میچ میں عمدہ کارکردگی کا مظاہرہ کیا۔
