سیالکوٹ میں بہو کا قتل ، پولیس نے مرکزی ملزم کو گرفتار کرلیا
سیالکوٹ (ڈیلی پاکستان آن لائن) سیالکوٹ کے نواحی شہر ڈسکہ میں سسرالیوں کے ہاتھوں حاملہ بہو کے بہیمانہ قتل کے کیس میں اہم پیشرفت سامنے آئی ہے، پولیس نے مرکزی ملزم کو گرفتار کرلیا۔
ایکسپریس نیوز کے مطابق پولیس نے ملزم نوید کو گرفتار کرکے آج ڈیوٹی مجسٹریٹ کی عدالت میں پیش کیا ، ڈیوٹی مجسٹریٹ نے 10 روزہ ریمانڈ کی درخواست مسترد کرتے ہوئے ملزم کا ایک روزہ جسمانی ریمانڈ منظور کرکے اسے پولیس کے حوالے کردیا۔کیس میں گرفتار دیگر تین ملزمان کو کل عدالت میں پیش کیا جائے گا۔
واضح رہے کہ سسرالیوں نے بہو کو قتل کرنے کے بعد لاش کے ٹکڑے کرکے بوری میں بند کرکے نالے میں پھینک دی تھی۔ لڑکی کا شوہر بیرون ملک مقیم ہے اور ساس صغراں، نند یاسمین، نواسے عبداللہ سمیت 4 افراد نے مل کر لڑکی کو بے دردی سے قتل کیا۔ پولیس نے مقدمہ درج کرکے ملزمان کو گرفتار کیا تو دوران تفتیش سفاک ملزمان نے اپنے اس گھناؤنے اقدام کا اعتراف جرم کرلیا۔
