بحیرۂ عرب میں پاک بحریہ کی کارروائی، 26 ملین ڈالر کی منشیات برآمد
راولپنڈی(ڈیلی پاکستان آن لائن)شمالی بحیرۂ عرب میں پاک بحریہ نے امریکی بحریہ کے ساتھ مشترکہ کارروائی میں کشتی سے 26 ملین ڈالرز کی منشیات برآمد کرلی۔
آئی ایس پی آر کے مطابق پاک بحریہ نے شمالی بحیرۂ عرب میں کمبائنڈ ٹاسک فورس 150 کے ساتھ انسداد منشیات آپریشن کیا ۔مشترکہ فوکسڈ آپریشن ہمالین سپرٹ میں پاک بحریہ کے جہازپی این ایس ذوالفقار نے حصہ لیا، آپریشن میں پاکستان میری ٹائم سکیورٹی ایجنسی کے جہاز پی ایم ایس ایس کولاچی نے بھی حصہ لیا۔
آئی ایس پی آر کے مطابق مشترکہ آپریشن میں امریکی بحریہ کے ائیرکرافٹ کیریئر یوایس ایس ابراہم لنکن نے مدد فراہم کی، امریکی کوسٹ گارڈ اور پاک بحریہ کے ہوائی جہازوں نے بھی مدد فراہم کی۔
آئی ایس پی آر کے مطابق انسداد منشیات آپریشن میں مشتبہ کشتی سے 1.3 ٹن حشیش برآمدکی گئی، ضبط کی جانے والی منشیات کی بین الاقوامی مارکیٹ میں مالیت تقریباً 26 ملین ڈالر زہے۔
