نواب شاہ: لوٹ مار کے دوران ڈاکوؤں کی فائرنگ، رینجرز افسر جاں بحق

نواب شاہ (ڈیلی پاکستان آن لائن )سندھ کے ضلع نواب شاہ میں ڈکیتی کے دوران مزاحمت پر فائرنگ سے رینجرز کا ایک افسر جاں بحق ہوگیا۔
نواب شاہ کے سینئر سپرنٹنڈنٹ پولیس (ایس ایس پی) تنویر تونیو نے بتایا کہ شہید ہونے والے رینجرز انسپکٹر، دیگر 2 اہلکاروں کے ہمراہ سفر کر رہے تھے کہ ان کے ساتھ لوٹ مار کی واردات کرنے کی کوشش کی گئی۔
ایس ایس پی تنویر تونیو نے بتایا کہ اس دوران ڈاکوؤں نے فائرنگ کی جس کے نتیجے میں اہلکار شہید ہوگیا۔ پولیس نے  ڈاکوؤں کو گرفتار کر کے ان سے لوٹی ہوئی نقدی برآمد کر لی۔
سندھ کے وزیر داخلہ قانون و پالیمانی امور ضیاء الحسن لنجار نے شہید بینظیر آباد میں فائرنگ سے رینجرز کے انسپکٹر شاہ رخ خان کی شہادت پر اظہار افسوس کیا۔صوبائی وزیر داخلہ نے شہید انسپکٹر شاہ رخ خان کے اہل خانہ سے ہمدردی و تعزیت کا اظہار کیا اور ان کے بلند درجات کی دعا کی۔
ضیاء الحسن لنجار نے کہا کہ فرائض کی ادائیگی کے دوران رینجرز انسپکٹر شاہ رخ خان نے شہادت کا اعلیٰ رتبہ پایا، رینجرز کے شہید انسپکٹر شاہ رخ خان سمیت تمام شہدا ءکی قربانیوں کو سلام عقیدت پیش کرتے ہیں۔
ان کا کہنا تھا کہ سیکیورٹی فورسز اور پولیس کی قربانیوں کی وجہ سے آج ہم امن کے ساتھ زندگی گزار رہے ہیں۔