خالی نہیں دنیائے ہوّس اہلِ وفا سے،کمیاب تو یہ لوگ ہیں نایاب نہیں ہیں،سٹیزن کونسل ملک کے سلگتے مسائل و موضوعات پر غور و فکر کرتی ہے

مصنف:رانا امیر احمد خاں 
قسط:11
رانا امیر احمد خاں کی سماجی خدمات،قانون کی سربلندی کے لیے کاوشات، وطن عزیز میں ناانصافی اور بدعنوانی کے خاتمے کے لیے انتھک جدوجہد، پاکستان سے بے لوث والہانہ محبت اور وفا بھرے جذبات کو میں اپنا سلامِ عقیدت پیش کرتا ہوں انہیں سٹیزن کونسل آف پاکستان کی جانب سے نشانِ اعزاز پیش کئے جانے پر دلی مبارکباد دیتا ہوں اور اپنے اس شعر پر گفتگو ختم کرتا ہوں۔ 
خالی نہیں دنیائے ہوّس، اہلِ وفا سے 
کمیاب تو یہ لوگ ہیں نایاب نہیں ہیں 
ظفر علی راجا
سٹیزن کونسل آف پاکستان کے صدر
 رانا امیر احمد خاں کے ساتھ ایک شام
سٹیزن کونسل آف پاکستان وکلاء اعلیٰ ریٹائرڈ سول اور فوجی افسران، ماہرین تعلیم، میڈیا، صنعت، تجارت، غرض ہر شعبۂ زندگی سے تعلق رکھنے والی نامور شخصیات پر مشتمل ایک سماجی و فلاحی تنظیم ہے، جو ملک کے سلگتے معاشی، معاشرتی، سیاسی اور قانونی مسائل و موضوعات پر غور و فکر کرتی ہے، اس کے حل کے لئے سفارشات مرتب کرتی ہے اور یہ سفارشات متعلقہ حکومتوں اور اداروں کو بھجواتی ہے اور یہ سلسلہ 2006ء میں اس تنظیم کے قیام سے اب تک جاری ہے۔ سپریم کورٹ کے وکیل رانا امیر احمد خاں اور ظفر علی راجہ بالترتیب اس تنظیم کے صدر اور جنرل سیکرٹری جبکہ پروفیسر ڈاکٹر شفیق جالندھری اس کے نائب صدر ہیں۔ 29 نومبر2013ء کو کونسل کی طرف سے رانا امیر احمد خاں کی طویل سیاسی، سماجی اور قانونی خدمات کی تحسین کے طور پر اْن کے ساتھ ایک شام منائی گئی اور اعتراف عظمت کے طور پر انہیں ”نشان اعزاز“ عطا کیا گیا۔ اس تقریب کے مہمان خصوصی سی پی این ای کے صدر اور روزنامہ ”پاکستان“ اور ماہنامہ”قومی ڈائجسٹ“ کے چیف ایڈیٹر مجیب الرحمٰن شامی تھے۔ ہمدرد سینٹر لٹن روڈ میں منعقد ہونے والی یہ تقریب اپنی حاضری کے اعتبار سے ایک بے مثال تقریب تھی جس میں ہر طبقہ فکر اور شعبہ زندگی سے تعلق رکھنے والی نامور شخصیات نے شرکت کی جن میں کونسل کے صدر، نائب صدر اور جنرل سیکرٹری کے ساتھ ساتھ جنرل (ر) راحت لطیف، تحریک پاکستان کے نامور کارکن ڈاکٹر ایم اے صوفی، ایڈووکیٹ عالمگیر پراسیکیوٹر جنرل پنجاب، آئی جی (ر) محمد الطاف قمر، سابق اکاؤنٹینٹ جنرل پنجاب جمیل بھٹی، ایڈیٹر "قومی ڈائجسٹ" راشد حجازی، پروفیسر نصیر احمد چودھری، سرفراز سید، افضال ریحان، افتخار مجاز، میجر (ر) صدیق ریحان، رانا سعید احمد ایڈووکیٹ، سید فیروز شاہ گیلانی ایڈووکیٹ اور احمد وسیم جیسی بے شمار شخصیات شامل ہیں۔ 
تقریب سے خطاب کرتے ہوئے مہمان خصوصی جناب مجیب الرحمٰن شامی نے کہا کہ رانا امیر احمد خاں خوش قسمت ہیں کہ اْنہیں ایسے دوست احباب ملے۔ کاش ایسے دوست احباب سب کے ہوں۔ رانا امیر احمد خاں کی شخصیت اور خدمات کے بارے میں اْن کے دوستوں نے آج حق ادا کر دیا ہے۔ رانا امیر احمد خاں ان پاکستانیوں میں سے ہیں جیسے قائداعظم کو مطلوب تھے۔ انہوں نے مزید کہا کہ رانا امیر احمد خاں کو چاہیے کہ وہ ایسا کچھ کریں کہ لوگوں کو عدالتوں سے جلد از جلد انصاف کی فراہمی ممکن ہو سکے۔ جلد انصاف کی فراہمی میں آج ایک بڑا مسئلہ وکلاء کی ہڑتالیں ہیں۔ چھوٹا سا مسئلہ ہو جائے تو بھی وکلاء ہڑتال کر دیتے ہیں اور عدالتوں کو تالے لگا دئیے جاتے ہیں، لیکن آج ہمیں اس روش کو بدلنا ہو گا۔ مجیب الرحمٰن شامی سے پہلے سابق آئی جی محمد الطاف قمر، پروفیسر نصیر اے چودھری، ظفر علی راجا ایڈووکیٹ اورسابق پراسیکیوٹر جنرل پنجاب عالمگیر ایڈووکیٹ نے رانا امیر احمد خاں کی زندگی اور خدمات پر ہلکے پھلکے اور دل نشیں اندازمیں روشنی ڈالی۔ 
(جاری ہے)
نوٹ: یہ کتاب ”بک ہوم“ نے شائع کی ہے (جملہ حقوق محفوظ ہیں)ادارے کا مصنف کی آراء سے متفق ہونا ضروری نہیں۔