ڈیرہ اسماعیل خان: نامعلوم افراد کی فائرنگ سے 2 کسٹمز اہلکار جاں بحق،4 زخمی
ڈی آئی خان(ڈیلی پاکستان آن لائن) ڈیرہ اسماعیل خان میں نامعلوم افراد کی فائرنگ سے 2 کسٹمز اہلکار جاں بحق اور 4 زخمی ہوگئے۔
نجی ٹی وی چینل دنیا نیوز کے مطابق پولیس حکام کا کہنا ہے کہ کسٹمز اہل کاروں پر فائرنگ کا واقعہ یارک ٹول پلازہ کے قریب پیش آیا۔انہوں نے بتایا کہ ناکے پر گاڑی میں بیٹھے کسٹمز اہلکاروں پر نامعلوم حملہ آوروں نے فائرنگ کی اور فرار ہوگئے جس کے نتیجے میں دو کسٹمز اہلکار موقع پر ہی جاں بحق جبکہ چار زخمی ہوگئے۔
پولیس حکام کا کہنا ہے کہ زخمی اہلکاروں کو ڈی ایچ کیو ہسپتال منتقل کر دیا گیا ہے۔
واضح رہے کہ 3 روز قبل بھی درابن روڈ پر کسٹم انٹیلیجنس کی گاڑی کو نامعلوم افراد نے نشانہ بنایا تھا جس میں انسپکٹر سمیت 5 کسٹمز اہلکار جاں بحق ہوئے تھے۔
