عدالتیں سسٹم ٹھیک کرنے میں اپنا کردار ادا کرتی ہیں

معروف سیاسی تجزیہ کار پروفیسر رسول بخش رئیس نے کہا ہے جہاں حکومتیں انتظامی امور کو چلانے میں ناکام ہو جائیں تو پھر وہاں عدالتیں قانونی دائرہ کار میں رہ کر گورننس کو ٹھیک کرنے میں اپنا کردار ادا کر سکتی ہیں۔ کراچی میں ٹینکر مافیا اربوں کا پانی بیچ رہا ہے ۔ وہ روزنامہ پاکستان کے سلسلے ایشو آف دی ڈے میں اظہار خیال کر رہے تھے ۔ لوگوں کو جب صاف پانی مہیا نہ ہو تعلیم و صحت عام آدمی کی پہنچ سے کوسوں دور ہو جائے ،جہاں لوگوں کو ملاوٹ والی اشیاء تواتر سے ملیں وہاں حکومتوں کا کام ہوتا ہے کہ اس کا نوٹس لیں اور اپنے اختیارات کو استعمال کرتے ہوئے ان مسائل کو حل کریں ، لیکن اگر وہ اپنے انتظامی امور کو بجا لانے میں ناکام ہو جائیں تو وہاں پھر عدالتیں سسٹم کو ٹھیک کرنے میں قانونی دائرہ کار میں رہ کر اپنا کردار ادا کرتی ہیں ۔ ماورائے عدالت قتل روز مرہ کا معمول بن جائے ،پنجاب کے میگا پروجیکٹس میں کرپشن زبان زد عام ہو وہاں اگر عدالتیں نوٹس نہ لیں تو پھر کیا کریں ۔ڈاکٹر رسول بخش رئیس نے کہا کہ پاکستان میں عدالتیں درست سمت میں کام کر رہی ہیں ۔ قانون کی تشریح کر کے اس کی عملداری کو یقینی بنانا ہی عدالتوں کا کام ہوتا ہے۔اس سے مقننہ اور عدلیہ میں کسی قسم کے تصادم کا کوئی خطرہ نہیں۔
پروفیسر رسول بخش رئیس