بشریٰ بی بی کے بیان سے ملک کا مستقبل داؤ پر لگایا گیا،طلا ل چودھری

اسلام آباد (مانیٹرنگ ڈیسک) رہنما مسلم لیگ ن و سینیٹر طلال چودھری نے کہا ہے کہ عمران خان کی اہلیہ بشریٰ بی بی کے بیان سے مفاد کی خاطر ملک کا مستقبل داؤ پر لگایا گیا۔ایک ویڈیو پیغام میں سینیٹر طلال چودھری کا کہنا تھا کہ پی ٹی آئی کی سیاست غیر سیاسی لوگوں کے ہاتھوں میں ہے، کل والے بیان پر انہیں شرم آنی چاہئے، جہاں آپ ننگے پاؤں جاتے تھے وہاں سے جیبیں بھر بھر کر لاتے تھے، سعودی عرب آپ کو پسند نہیں تھا تو ان سے تحفے کیوں لیے، اگر وہ ٹھیک نہیں تھے ان کے ڈرائیور کیوں بنے؟انہوں نے کہا کہ جھوٹ پر بیانیہ بنانا آپ کی عادت ہے، جھوٹ کا بیانیہ سائفر، آئی ایم ایف اور کبھی چائنہ کی شکل میں بنایا گیا، بانی پی ٹی آئی نے چائنہ اور اس کے منصوبوں پر کرپشن کا الزام لگایا، سعودی عرب ہر مشکل وقت میں پاکستان کے ساتھ کھڑا ہوتا ہے، یہ پاکستان کے دوست ملک کو ہی ٹارگٹ کیوں کرتے ہیں۔طلال چودھری کا کہنا تھا کہ سعودی عرب میں 35 لاکھ پاکستانی کام کرتے ہیں، چائنہ پر الزام لگایا جاتا ہے تاکہ پاکستان کی معیشت برباد ہو، آپ اپنی رہائی کیلئے ہر چیز تباہ کرنا چاہتے ہیں، بانی پی ٹی آئی نے عہدوں کا غلط استعمال کیا۔

طلا ل چودھری