دنیا میں امن، ترقی اور خوشحالی کے لئے ملکر کام کرنا چاہیے: وزیراعظم

اسلام آباد ( ڈیلی پاکستان آن لائن ) وزیراعظم شہباز شریف نے کہا ہے کہ آج کے دن کے حوالے سے دنیا میں امن، ترقی اور خوشحالی کے لیے ملکر کام کرنا چاہیے۔
نجی ٹی وی "دنیا نیوز" کے مطابق وزیراعظم ہاؤس میں تقریب سے خطاب کرتے ہوئے وزیراعظم شہباز شریف نے کہا کہ قرآن پاک میں حضرت عیسیٰ علیہ السلام کا تفصیل سے ذکر موجود ہے، بطور مسلمان ہم انہیں اللہ کا نبی مانتے ہیں، انہیں اللہ پاک نے کئی معجزات سے نوازا تھا، قرآن پاک میں حضرت عیسیٰؑ کی والدہ حضرت مریم علیہ السلام کا ذکر بھی موجود ہے۔
شہباز شریف نے کہا کہ حضرت عیسیٰ علیہ السلام کی جائے پیدائش پر آج قتل کا بازار گرم ہے، پوری دنیا میں جہاں جہاں مسیحی برادری بستی ہے انہیں چاہیے کہ خون کی اس ہولی کو ختم کروانے کے لیے اپنا پورا زور لگائیں، مسیحی برادری حضرت عیسیٰ علیہ السلام کے امن کے مشن پر عمل کروانے کے لیے کوششیں کرے۔
انہوں نے کہا کہ میں اور میرے بڑے بھائی نواز شریف ہم دونوں مشنری سکولوں سے پڑھے ہوئے ہیں، آج ہماری استاد مس پاﺅل دنیا میں موجود نہیں لیکن آج کا دن ہمیں یہ درس دیتا ہے کہ ملکر امن اور ترقی کو فروغ دیں، تفریق در تفریق کا خاتمہ کریں، تحمل اور برداشت سے کام لیں۔
وزیراعظم نے کہا کہ ہمیں اقلیتوں کے حقوق کا خیال رکھنا چاہیے، ان کا احترام کرنا چاہیے تاکہ وہ بھی خود کو ملک کا برابر کا شہری سمجھیں اور وہ بھی ہمارے ساتھ ملکر پاکستان کی ترقی اور خوش حالی میں حصہ ڈال سکیں۔مسیحی برادری نے ہر شعبے میں اپنی خدمات انجام دی ہیں خواہ وہ پاکستان کی جنگیں ہوں، سرکاری اداروں میں فرائض انجام دینے کی بات ہو، یا کوئی دوسرا محاذ، مسیحی برادری نے ہر جگہ بہترین خدمات انجام دی ہیں، سیسل چودھری اور جسٹس کارنیلئس کو کون نہیں جانتا؟ مسیحی برادری کا پاکستان کی ترقی میں کردار سنہری حروف سے لکھا جائے گا۔
وزیراعظم نے کہا کہ حضرت عیسیٰؑ اور قائداعظم دونوں کی تاریخ پیدائش 25 دسمبر ہے اس وجہ سے اس دن کی اہمیت ہمارے لیے مزید بڑھ جاتی ہے۔
شہباز شریف نے بابائے قوم قائداعظم کے قول کا حوالہ دیتے ہوئے کہا کہ اقلیتوں کا تحفظ ہماری ترجیح رہی ہے، آپ کی ترقی کا سفر اور بہتری ہمارے ایجنڈے کا حصہ ہے۔ لہٰذا آج میں آپ کو کرسمس کی مبارک باد پیش کرتا ہوں اور یقین دلاتا ہوں کہ آپ کی ترقی اور خوشحالی نہ صرف ہمیں عزیز ہے بلکہ ہماری ذمہ داری ہے جسے بھرپور انداز میں ادا کرتے رہیں گے اور مل کر پاکستان کو عظیم بنائیں گے۔