موٹاپا کم کرانے کا وعدہ پورا نہ کرنے پر خاتون نے ’جم ٹرینر‘ شوہر سے طلاق مانگ لی

نئی دہلی (ویب ڈیسک) بھارت کے شہر آگرہ میں ایک خاتون نے اپنے جم ٹرینر شوہر سے اپنا وزن کم کرنے میں مدد کرنے کا وعدہ پورا نہ کرنے پر طلاق لینے کا فیصلہ کیا ہے۔

نیو آگرہ پولیس اسٹیشن سے شروع ہونے والے اس کیس نے اپنے منفرد حالات کی وجہ سے خاصی توجہ حاصل کی ہے۔خاتون کے مطابق انہوں نے جم ٹرینر کے جسم سے متاثر ہو کر اس سے شادی کی۔ شادی سے پہلے، اس نے واضح طور پر ایک شرط رکھی تھی کہ شوہر خاتون کا وزن کم کرنے میں مدد کرے گا، اور شوہر نے وعدہ بھی کیا۔

جوڑے نے گزشتہ سال شادی کی تھی، لیکن مسلسل کوشش کے باوجود شادی کے بعد سے اس خاتون کا وزن 75 کلو گرام پر برقرار ہے۔اپنی شکایت میں، خاتون نے اپنی مایوسی کا اظہار کرتے ہوئے کہا کہ اسے شادی کے بعد اپنے وزن میں نمایاں کمی دیکھنے کی امید تھی، یہ وعدہ اس کا شوہر پورا کرنے میں ناکام رہا۔

طلاق کے حصول کیلئے خاتون کی ثابت قدمی نے ابتدائی پولیس شکایت کے بعد کیس فیملی کاؤنسلنگ سینٹر تک پہنچا دیا، جہاں کونسلر نے ثالثی اور مسئلہ کو حل کرنے کی کوششیں کیں۔تاہم، خاتون اپنے فیصلے پر ثابت قدم ہیں، اور اس بات پر مصر ہیں کہ وہ موجودہ حالات میں اپنے شوہر کے ساتھ رہنا جاری نہیں رکھ سکتیں۔دوسری جانب جم ٹرینر شوہر نے اس شادی کو نبھانے پر آمادگی ظاہر کر دی ہے۔لیکن دونوں کی کاؤنسلنگ ابھی جاری ہے۔