ٹی 20 ورلڈ کپ سیمی فائنل میں شکست پر سب بلک بلک کر روئے، حسن علی کا انکشاف
لاہور(ڈیلی پاکستان آن لائن) پاکستان کرکٹ ٹیم کے باؤلر حسن علی کا کہنا ہے کہ 2021 کے ٹی 20 ورلڈ کپ سیمی فائنل میں سب بلک بلک کر روئے۔
قومی ٹیم کے بولر حسن علی نے پوڈ کاسٹ انٹرویو میں ٹی 20 ورلڈ کپ کے سیمی فائنل سے متعلق بات کرتے ہوئے کہا کہ آسٹریلیا سے شکست کے بعد کچھ لڑکوں نے تو گراؤنڈ میں ہی رونا شروع کردیا۔ ڈریسنگ روم میں ہرشخص بلک بلک کر رو رہا تھا۔ سینئر کھلاڑی جونئیر کھلاڑیوں کو چپ کرواتے رہے۔اس وقت جو بھی ڈریسنگ روم میں آتا روئے بغیر نہیں رہ سکتا تھا کیونکہ ماحول ہی ایسا تھا۔ ٹیم نے ٹائٹل جیتنے کے لیے بہت محنت کی تھی اور ایک جان ہو کر کھیلے تھے۔ ایک ڈراپ کیچ اور 3 چھکوں نے پوری صورتحال تبدیل کردی۔
حسن علی کا کہنا تھا کہ کرکٹ صرف نوکری نہیں عشق ہے۔
بابر اعظم سے متعلق ایک سوال کے جواب میں قومی کرکٹر نے کہا کہ بابر اعظم کو ٹیم کے کھلاڑی" کنگ" ہی کہتے ہیں اور کوئی بھی مسئلہ ہو یہی کہتے ہیں کہ" کنگ "کو کہو وہ کرلے گا۔ ہمیں بابر اعظم پر فخر ہے اور ہم بابر کو اون کرتے ہیں۔
