حج کے دوران انتقال کرنے والوں میں امریکی جوڑا بھی شامل لیکن اپنی بیٹی کو آخری میسیج میں کیا بتایا تھا؟ افسوسناک تفصیلات منظرعام پر
مکہ ، لندن (ویب ڈیسک)رواں سال شدید گرمی کے باعث 1300 سے زائد عازمین اپنی جان سے ہاتھ دھو بیٹھے، ان میں ایک امریکی جوڑا بھی شامل تھا، جن کی بیٹی نے حج کے دوران گرمی میں ان پر بیتی کہانی بیان کی۔
آج نیوز کے مطابق امریکی وسطی ریاست میری لینڈ میں بووی کے رہائشی 71 سالہ الحاج علیو دوسی ووری اور ان کی 65 سالہ اہلیہ ایساتو ووری حج کے دوران ہیٹ اسٹورک سے انتقال کر گئے تھے۔ ان کی بیٹی نے بتایا کہ والدین شدید گرمی میں دو گھنٹے سے زیادہ پیدل چلتے رہے یہاں تک کہ وہ ہیٹ سٹروک کے باعث جاں بحق ہوگئے۔
یہ امریکی جوڑا 16 جون بروز اتوار سعودی عرب پہنچنے کے دو ہفتے بعد لاپتا ہو گیا تھا، کچھ دنوں بعد ان کی بیٹی کو اطلاع دی گئی کہ ان کے والدین انتقال کر گئے ہیں۔مرنے والے امریکی حاجی علیو دوسی کی بیٹی سعیدہ ووری نے بی بی سی کو بتایا کہ ان کے والدین کو حج پر لے جانے والے ٹوئر گروپ نے مبینہ طور پر وعدے کے باوجود مناسب مقدار میں کھانے، پانی سمیت بہت سی ضروی اشیا فراہم نہیں کیں۔
بی بی سی کے مطابق غمزدہ بیٹی نے بتایا کہ ان کے والدین کے لیے حج انتہائی اہمیت کا حامل فریضہ تھا اور انہوں نے حج پر جانے کے لیے فی کس 11 ہزار 500 امریکی ڈالر ادا کیے تھے۔سعیدہ نے مزید کہا کہ ’ان کے والدین کی حج کرنے کی شدید خواہش تھی اور اس سفر کے لیے وہ بہت پرجوش تھے۔‘سعیدہ ووری نے بتایا کہ ’انہیں بہت سی وہ چیزیں فراہم نہیں کی گئیں جن کا ان سے وعدہ کیا گیا تھا۔‘
ان کے مطابق والدین کو شدید گرمی میں کھانے اور پینے کے پانی کی کمی کی شکایت تھی اور انہوں نے اپنی بیٹی کو بتایا کہ ’وہ دن میں ایک ہی وقت کھانا کھا رہے ہیں‘ اور اس بات کو یقینی بنا رہے ہیں کہ ان کے جسم میں پانی رہے، والدین نے اپنے آخری ٹیکسٹ میسیج میں لکھا تھا کہ وہ ’دو گھنٹے سے زیادہ دیر سے پیدل چلے جا رہے ہیں۔‘
اور اس کے کچھ دیر بعد ہی قونصلر حکام اور ان کے ٹور گروپ کے ایک رکن نے تصدیق کی کہ ان کے والدین کی موت ہو گئی ہے۔سعیدہ کا کہنا ہے کہ ان کا سعودی عرب جانے کا ارادہ ہے تاکہ انہیں یہ معلوم ہو سکے کہ ان کے والدین کی تدفین کہاں ہوئی ہے۔
