نیشنل اتھلیٹکس چیمپئن شپ 27 نومبر سے ملتان شروع ہو گی

اسلام آباد (یواین پی)  52 ویں نیشنل اتھلیٹکس چیمپئن شپ کی تیاریاں عروج پر جاری ہیں اور یہ چیمپئن شپ پاکستان اتھلیٹکس فیڈریشن کے زیر اہتمام 27 نومبر سے ملتان شروع ہو گی۔ پاکستان اتھلیٹکس فیڈریشن کے صدر برگیڈیئر ریٹائرڈ وجاہت حسین نے بتایا کہ چیمپئن شپ میں ملک بھر سے مرد اور خواتین کی ٹیمیں حصہ لیں گی جن میں پاکستان آرمی، پاکستان ائیر فورس، پاکستان نیوی، پاکستان واپڈا، پاکستان ریلوے، پاکستان پولیس، ہائر ایجوکیشن کمیشن، پنجاب، خیبرپختونخوا، سندھ، بلوچستان، اسلام آباد، گلگت بلتستان، آزاد جموں و کشمیر کے علاوہ ایچی سن کالج لاہور اور سپیرئیر یونیورسٹی لاہور کی ٹیمیں شامل ہیں اور چیمپئن شپ میں مردوں کے 23 اور خواتین کے 21 ایونٹس منعقد ہونگے۔ چیمپئن شپ میں شرکت کرنے والی ٹیموں کی منیجرز میٹنگ 26 نومبر کو ہوگی جس میں چیمپئن شپ کے ڈراز اور قوانین کے بارے میں آگاہ کیا جائے گا۔ چیمپئن شپ 30 نومبر تک جاری رہے گی اور چیمپئن شپ کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔