یہ کہہ کر ٹال دیتے ہیں کبھی سن لیں گے فرصت میں۔۔۔

یہاں ہے ایک کیفِ سرمدی صہبائے الفت میں
سکونِ زندگی ہے مست تر سازِ محبت میں

کشش کیا جانتے تھے وہ اسیرانِ محبت میں
کہ اٹھ آیا بالآخر گلستاں زندانِ وحشت میں

کیا کرتا ہے اکثر ذکر کیوں یہ دخترِ رز کا
یہ باتیں آئیں کب سے وعظِ سادہ طبیعت میں

جو کہتا ہوں نہ لاﺅ غیر کو مجھ تک تو کہتے ہیں
ملا کرتے نہیں ہم یوں کسی سے عین خلوت میں

انہیں جب بھی سنانا چاہتا ہوں داستانِ دل
یہ کہہ کر ٹال دیتے ہیں کبھی سن لیں گے فرصت میں

دلِ آشفتۂ وحشی بڑا نازوں کا پالا تھا
خبر کیا تھی کہ ہوجائے گا یوں برباد الفت میں

میں پیشِ داورِ محشر جو ان سے خوں بہا چاہوں
کہیں الٹے بگڑ بیٹھیں قیامت ہو قیامت میں

کلام : وقار حیدری مالیگانوی ( بھارت )