سات سالہ بچے کیخلاف اغواء، ڈکیتی کا مقدمہ ، معصوم ملزم عدالت پیش
گجرات(مانیٹرنگ ڈیسک) پولیس نے سات سالہ بچے کے خلاف 30سالہ شخص کے اغواءاور ڈکیتی کا مقدمہ درج کرکے چھاپہ مارکارروائیاں شروع کردیں تاہم بچے کے والدین نے خود ہی بچے کو عدالت میں پیش کردیا۔
نجی ٹی وی چینل کے مطابق گجرات کے تھانہ سول لائنز میں 30 سالہ عامر اقبال نامی شخص کی مدعیت میں درج کرائے گئے مقدمے میں موقف اختیار کیا گیا ہے کہ سات سالہ سمیر بٹ نے معمولی تلخ کلامی کے بعد اسے اغوا کرلیا اور اسلحہ کے زور پر اس سے موبائل فون اور نقدی چھین لی۔
پولیس نے سمیر بٹ کے خلاف دفعہ 365 کے تحت اغواءا ور اسلحے کے زور پر لوٹ مار کا مقدمہ درج کرلیا۔
پولیس کی جانب سے چھاپوں کے بعد سمیر کے والدین نے اسے عدالت کے روبرو پیش کردیا ہے جس پر عدالت نے برہمی کااظہار کرتے ہوئے پولیس کو مزید چھاپوں سے روکدیا اور متعلقہ تھانے کے ایس ایچ اوکو تفتیشی افسر سمیت طلب کرلیا۔
