میانوالی: کنڈل پیٹرولنگ پوسٹ پر حملہ، 1 اہلکار شہید،2دہشتگرد ہلاک
میانوالی(ڈیلی پاکستان آن لائن) میانوالی میں کنڈل کے مقام پر پٹرولنگ پوسٹ پر دہشتگردوں کے حملے میں1 اہلکار شہید جبکہ 2 دہشتگرد مارے گئے۔
نجی ٹی وی چینل "دنیا نیوز" کے مطابق آئی جی پنجاب عثمان انور کا کہنا ہے کہ 10 سے 12 دہشتگردوں نے کنڈل کے مقام پر پیٹرولنگ پوسٹ پر حملہ کیا تھا، چھت پر تعینات اہلکار کی جوابی فائرنگ سے 2دہشتگرد ہلاک ہوگئے۔
آئی جی پولیس کا کہنا ہے کہ پیٹرولنگ پوسٹ پر دو اطراف سے حملہ کیا گیا تھا، پنجاب پولیس نے بھرپور جوابی کارروائی کرتے ہوئے کنڈل پیٹرولنگ پوسٹ پر دہشتگردوں کا حملہ ناکام بنا دیا، پولیس کی جوابی کارروائی کے بعد 2 دہشتگرد ہلاک جبکہ دیگر فرار ہوگئے۔
عثمان انور کے مطابق حملے میں پولیس ہیڈکانسٹیبل ہارون خان بھی دہشتگردوں کے خلاف بہادری سے لڑتے ہوئے شہید ہوگئے۔
آئی جی پنجاب کا کہنا تھا کہ ایس ایم ڈی لائٹس کے ساتھ سی ٹی ڈی کی ٹیمیں پہنچ گئی ہیں، دہشتگردوں کا پیچھا کیا جا رہا ہے، اندھیرے اور پہاڑی علاقہ ہونے کی وجہ سے انتہائی احتیاط کے ساتھ آپریشن کیا جا رہا ہے۔
