اسرائیل پر حملے کے بعد ایران میں کیا صورتحال ہے؟ تازہ تفصیلات سامنے آ گئیں

تہران (ویب ڈیسک) ایران کی جانب سے اسرائیل پر حملے کے بعد خطے میں تنازع بڑھنے کے خدشات کے سبب ایران میں پیٹرول پمپس پر گاڑیوں کا رش لگ گیا۔

غیر ملکی میڈیا کی رپورٹس کے مطابق ایران کے اسرائیل پر حملے کے بعد خطے میں تنازع بڑھنے کے خدشات بڑھ گئے ہیں جس کے پیش نظر ایران کے دارالحکومت تہران میں پیٹرول پمپس پر رش  لگ گیا۔ پیٹرول پمپس پر ایندھن بھرنے کے لیے گاڑیوں کی لمبی قطاریں لگ گئیں۔

یاد رہے کہ گزشتہ روز ایران نے فلسطینی مزاحمتی تنظیم حماس کے سربراہ اسماعیل ہنیہ اور حزب اللہ کے سیکرٹری جنرل حسن نصراللہ کی شہادت کا بدلہ لیتے ہوئے اسرائیل پر بیلسٹک میزائل داغے۔ اسرائیلی میڈیا کے مطابق ایران سے اسرائیل کی جانب کم از کم 400 میزائل فائر کیے گئے۔

دوسری جانب ایرانی وزیرخارجہ عباس عراغچی کا کہنا ہے کہ اسرائیل پر ایران کا حملہ مکمل ہوگیا ہے، اسرائیل نے مزید جوابی کارروائی کی تو جواب دیا جائے گا۔