سینیٹ کمیٹی کی الطاف حسین کیخلاف غداری کا مقدمہ درج کرنے کی سفارش

 اسلام آباد(آئی این پی) سینیٹ کی قائمہ کمیٹی برائے قانون و انصاف نے ایم کیو ایم کے بانی الطاف حسین کیخلاف پاکستان مخالف تقریر کر نے پر آرٹیکل 6کے تحت غداری کا مقدمہ درج کرنے کی سفارش کردی، مسلم لیگ (ن)کے رکن کمیٹی سینیٹر نہال ہاشمی نے کہا کہ ؤایم کیو ایم کے بانی نے لندن میں بیٹھ کر ملک کے خلاف تقاریر کیں جسے کسی طور پر بھی برداشت نہیں کیا جاسکتا، ایم کیو ایم کے بانی کے خلاف غداری کا مقدمہ درج کیا جائے، جس پر کمیٹی کے باقی ارکان نے ان کی تائید کی۔ چیئر مین سینیٹر جاوید عباسی نے کہا کہ جن لوگوں نے پاکستان کے خلاف بات کی انہیں سخت سزا دی جائے۔کمیٹی نے الطاف حسین کیخلاف حکومت کی جانب سے برطانیہ کو بھجوائے گئے ریفرنس کی تفصیلات طلب کرتے ہوئے سیکرٹری قانون کو ہدایت کی کہ وہ آئندہ اجلاس میں تمام سوالات کا تحریری جواب دیں ۔ تفصیلات کے مطابق گزشتہ روزپارلیمنٹ ہاؤس اسلام آباد میں سینیٹر جاوید عباسی کی سربراہی میں قائمہ کمیٹی برائے انصاف اور قانون کا اجلاس ہوا۔ اجلاس کے دوران ایم کیو ایم کے بانی الطاف حسین کی جانب سے پاکستان کے خلاف تقریر اور نعروں کا معاملہ زیر غور آیا۔پیپلز پارٹی کے سینیٹر بابر اعوان نے قانونی نکتہ اتھاتے ہوئے کہا کہ بین الریاستی معاہدہ ہو یا ترامیم، وزارت قانون کے ذریعے ہی کی جاتی ہیں، کیا برطانیہ کو بھجوائے گئے ریفرنس کی منظوری وزارت قانون سے لی گئی، کابینہ میں ریفرنس پر کیا بات ہوئی اس کی بھی تفصیلات پیش کی جائیں، کیا سیاسی جماعت کے خلاف سپریم کورٹ میں ریفرنس دائر کیا جا رہا ہے۔ انہوں نے مزید استفسار کیا کہ ویڈیو میں ایک رکن قومی اسمبلی کی بھی پاکستان مخالف نعروں کی آواز ہے، کیا اس رکن کے خلاف سپیکر کے پاس ریفرنس دائر کیا جا رہا ہے۔اجلاس کے دوران سینیٹر نہال ہاشمی نے تجویز دی کہ جو شخص بھی پاکستان مخالف اقدامات میں ملوث ہو اور یا وہ ملکی سلامتی کے خلاف کام کرے تو اس کے خلاف غداری کا مقدمہ درج کیا جائے جس کی سزا موت ہے۔ ایم کیو ایم کے بانی نے لندن میں بیٹھ کر ملک کے خلاف تقاریر کیں جسے کسی طور پر بھی برداشت نہیں کیا جاسکتا۔ ایم کیو ایم کے قائد کے خلاف غداری کا مقدمہ درج کیا جائے۔ سینیٹر جاوید عباسی نے کہا کہ جن لوگوں نے پاکستان کے خلاف بات کی انہیں سخت سزا دی جائے۔قائمہ کمیٹی نے تائید کی کہ جن لوگوں نے پاکستان کے خلاف بات کی ان پرآرٹیکل 6 کے تحت مقدمہ درج کیا جائے، اس کے علاوہ کمیٹی نے ایم کیو ایم کے بانی کے خلاف برطانیہ کو بھجوائے گئے ریفرنس کی تفصیلات طلب کرتے ہوئے سیکرٹری قانون کو ہدایت کی کہ وہ آئندہ اجلاس میں تمام سوالات کا تحریری جواب دیں۔

غداری کا مقدمہ