" یہ نئی غلامی ہے، میرے پاس کوئی اور راستہ نہیں" نوشرت بھروچا صنفی تعصب پر کھل کر بول پڑیں

ممبئی (ڈیلی پاکستان آن لائن)  بالی وڈ اداکارہ نوشرت بھرُوچّا نے حال ہی میں ایک انٹرویو کے دوران فلم انڈسٹری میں پائے جانے والے  معمولی نوعیت کے صنفی تعصب پر کھل کر بات کی ہے۔ اپنی آنے والی فلم "چھوری 2" کی پروموشن کے دوران انہوں نے ہندوستان ٹائمز سے گفتگو میں کہا کہ وہ اکثر ان مسائل پر آواز اٹھانے کی کوشش کرتی ہیں، لیکن اکثر اوقات انہیں خاموش کر دیا جاتا ہے، جس کے باعث وہ اپنے خیالات کو دبا دیتی ہیں۔

نوشرت نے کہا: "میرے لیے روزمرہ کے مسائل، معمولی صنفی تعصب وہ چیز ہے جو سب سے زیادہ تکلیف دہ ہے۔ میرے پاس کوئی اور راستہ نہیں، مجھے اسے برداشت کرنا پڑتا ہے۔ یہی نئی غلامی ہے۔" انہوں نے مزید وضاحت کی کہ جب کسی پرانی روایت کے خلاف آواز بلند کی جاتی ہے تو احتجاج اور تحریکیں چلتی ہیں، لیکن ایسے مسائل پر جو نظر نہیں آتے اور عام سمجھے جاتے ہیں، ان پر بات کرنے کی جگہ بھی نہیں ملتی۔

انہوں نے بتایا کہ کئی مرتبہ انہیں کہا گیا کہ "یہ سوال مت پوچھو"، "اس کا جواب ہمارے پاس نہیں"، یا "یہ تمہارا دائرہ کار نہیں"، اور ایسے ماحول میں کام کرتے ہوئے انہیں مجبوراً خاموش رہنا پڑتا ہے۔ نوشرت نے کہا: "یہ مسئلہ جھگڑالو یا ضدی ہونے کا نہیں، بلکہ ایک مجبوری ہے کہ مجھے دکھاوا کرنا پڑتا ہے کہ میں ٹھیک ہوں، تاکہ میں اس دنیا میں اپنا وجود قائم رکھ سکوں۔"