غزہ میں بربریت جاری ہے اور ہم خاموش ہیں، سیمینار سے وفاقی ٹیکس محتسب ڈاکٹر آصف محمود جاہ اور دیگر شخصیات کا خطاب

 لاہور( ڈیلی پاکستان آن لائن)جب سے اسرائیل نے غزہ پر جارحیت کی ہم مظلوم فلسطینیوں کی اخلاقی اور مالی مدد کرتے چلے آرہے ہیں۔ ان خیالات کا اظہار وفاقی ٹیکس محتسب ڈاکٹر آصف محمود جاہ نے کسٹمز ہیلتھ کیئر سوسائٹی کے زیر اہتمام سیمینار" غزہ میں اسرائیل کی جاری بربریت اور اسلامی امہ کی ذمہ داریاں"میں صدارتی خطاب میں کیا۔ انھوں نے کہا ہم نے ترکئے کے ذریعے 35ہزار ڈالر زبھی بھجوائے،جبکہ غزہ سے اسلام آباد آئے میڈیکل کے طلباء سے ایف ٹی او ہاؤس میں  ملاقات کی اور ان کا عزم و حوصلہ دیکھ کر حیران رہ گیا  ،ان میں سے اکثر کے والدین بہن بھائی شہید ہوگئے تھے بلاشبہ غزہ کے مظلومین امت کا فرض ادا کر رہے ہیں ۔

اوریا مقبول جان نے کہاآج 57اسلامی ممالک میں سے5میں جنگ جاری ہے اور ہم سب خاموش ہیں ،غزہ پر اسرائیل کی جارحیت کے باوجود کوئی مسلمان فلسطینی علاقہ چھوڑنے پر تیار نہیں ،جبکہ چنگیز اور ہلاکو کے دور میں وہ بربریت نہیں ہوئی تھی جو آج اسرائیل نہتے فلسطینوں پر کر رہا ہے ۔

ڈاکٹر فیاض رانجھا نے کہا تاریخ گواہ ہے کہ جب بھی مسلمانوں نے اللہ کی مدد پر بھروسہ کیا اللہ کی نصرت اور تائید نے انہیں ہمیشہ سرخرو کیا آج بھی امت مسلمہ کا اتحاد اور اللہ کی مدد پر یقین امت کو فتح اور کامیابی سے ہمکنار کر سکتا ہے۔اللہ ڈاکٹر آصف محمود جاہ کی حفاظت فرمائے ان کی زندگی مظلومین اور مستحقین کی مدد میں گزری۔

سیمینار سے ڈاکٹر محمد رفیق ،منشا ءقاضی،ایم اے رف رف ،عبدالستار عاصم اور ڈاکٹر امجد نے بھی خطاب کیا جبکہ پرفیسر ڈاکٹر ضیاء المظہری ،ناصر رضوی اور ممتاز راشد لاہوری نے منظوم کلام سنایا۔ سیمینار میں مجدد نعت حفیظ تائب فاؤنڈیشن کے عبدالمجید  منہاس ،عارف نوناروی ،سلمان خان اور گلفراز احمد سمیت مختلف شعبوں کی معروف شخصیات نے شرکت کی ۔