عدا لتی اصلاحات ، ہیلتھ کارڈ ، طالبان کو وظائف ، کرایہ داروں کو گھر ، بھاشا ڈیم کی تعمیر ، مسلم لیگ (ن) کا انتخابی منشور

عدا لتی اصلاحات ، ہیلتھ کارڈ ، طالبان کو وظائف ، کرایہ داروں کو گھر ، بھاشا ...

  

لاہور( جنرل رپورٹر)مسلم لیگ(ن)کے صدر شہباز شریف نے اپنی پارٹی کا انتخابی منشور پیش کردیا ہے۔پنجاب کے صوبائی دارالحکومت لاہور میں پارٹی منشور پیش کرتے ہوئے صدر(ن)لیگ شہبازشریف نے کہا کہ 2013 سے پہلے لاکھوں لوگ بے روزگار تھے، 12 گھنٹے لوڈشیڈنگ تھی، معیشت تباہ ہوچکی تھی اور صنعتوں کا پہیہ رک چکا تھا لیکن(ن)لیگ کی حکومت آنے کے بعد 11ہزار میگا واٹ بجلی پیدا کی، سی پیک جیسا عظیم منصوبہ تیار کیا، شمسی توانائی کو بروئے کارلایا گیا اور ترقی کا سفر شروع ہوا، ملک میں شفاف ترین منصوبے لگانے کا نیاریکارڈقائم کیا اور توانائی منصوبوں میں قوم کے160ارب روپے بچائے ، زراعت کو مضبوط کرنے کے لیے (ن)لیگ کی حکومت نے بڑے اقدامات کیے اورخودروزگاراسکیم جیساتاریخی پروگرام دیا، نوازشریف کی حکومت میں کھاد کی قیمت آدھی کردی گئی۔انہوں نے کہا کہ فوج کی مدد سے کراچی سمیت ملک بھر میں امن قائم کیا اور امن و امان قائم کرنے کا مشن نوازشریف کا تھا، نوازشریف نے صحت عامہ سہولیات میں انقلابی اقدامات اٹھائے اور اصلاحات کیں شہباز شریف نے کہا کہ آنے والے دنوں میں سب سے بڑا مسئلہ پانی کا ہے، بھارت ڈھٹائی سے ڈیم پر ڈیم بنا رہا ہے اس لیے دیامر بھاشا ڈیم ہماری سب سے پہلی ترجیح ہے۔انہوں نے تمام فریقین سے الیکشن کے فوری بعد بھاشا ڈیم پر کام شروع کرنے کی درخواست کرتے ہوئے کہا کہ ڈیموں کے لیے چندہ بھی اکٹھا کرنا پڑے تو کریں گے انہوں نے کہا کہ مہمند ہائیڈرو پاور پراجیکٹ بھی بنائیں گے۔انہوں نے کہا کہ آئندہ حکومت کا موقع ملا تو عدالتی نظام میں جامع اصلاحات کی جائیں گی جس کے تحت ججوں کی تعداد میں اضافہ ہو گا۔ ہماری گزشتہ حکومت میں جاری کیے گئے ہیلتھ کارڈ کو ملک بھر میں پھیلائیں گے، ہرسکول میں ٹیکنیِکل اور ووکیشنل سینٹر بنائیں گے، دیہاتوں میں ایگرو بیس انڈسٹری لگائیں گے اور ملک میں سرمایہ کاری کے فروغ کے لیے کام کریں گے۔ شہباز شریف نے کہا کہ ہم پنجاب ایجوکیشن انڈومنٹ فنڈز کو پورے پاکستان تک پھیلائیں گے، غریب بچیوں کے ماہانہ وظیفے کو جاری رکھیں گے، محروم طبقے کو اپنے پیروں پر کھڑا کرنا ہمارا منشور ہے۔شہبازشریف نے کہا کہ پاکستان کی بڑی آبادی کرائے کے گھروں میں رہتی ہے، اللہ نے موقع دیا تو جس طرح ہم نے پاور پلانٹ لگائے اسی طرح لاکھوں لوگوں کو ہاوسنگ سکیم بنا کر دیں گے، ہاوسنگ سکیم بننے سے لاکھوں لوگوں کو روزگار بھی ملے گا۔ اس کے علاوہ پبلک ٹرانسپورٹ کو مزید بہتر بنانے کے لیے پانچ سالوں میں کام کریں گے۔مسلم لیگ (ن)کی سابق حکومت کی پانچ سالہ کارکردگی پیش کرتے ہوئے پارٹی صدر نے کہا کہ 2013 میں بجلی بحران اور امن و امان ایک بہت بڑا مسئلہ تھا اور لوڈشیڈنگ کی وجہ سے پورا ملک سراپا احتجاج تھا۔انہوں نے کہا کہ 2013 میں ملک بھر میں واپڈا کے دفاتر کے باہر احتجاج کیا جاتا تھا، بجلی نہ ہونے کی وجہ سے بے روزگاری میں اضافہ ہو رہا تھا لیکن نواز شریف نے 2013 میں وعدہ کیا تھا کہ بجلی بحران کا خاتمہ کروں گا۔شہباز شریف نے کہا کہ ہم نے 5 سالوں میں 11 ہزار میگاواٹ بجلی بنائی، ایل این جی کے منصوبوں کے ذریعے 5 ہزار میگاواٹ بجلی سسٹم میں آئی مسلم لیگ (ن)نے نیلم جہلم منصوبے کو قابل عمل بنایا، تاریخ میں پہلی بار شمسی توانائی سے چلنے والے منصوبے لگائے گئے، جبکہ تربیلا فور سے ایک ہزار میگاواٹ بجلی سسٹم میں شامل ہوئی۔انہوں نے کہا کہ مسلم لیگ(ن)نے کراچی سمیت پورے ملک میں امن قائم کیا، ہمارے دور میں برق رفتار اور شفاف منصوبے لگے، نواز شریف نے ہیلتھ کارڈ کا اجرا کیا اور حکومت نے زراعت کو مضبوط کیا، کسانوں کو بلاسود قرضے دیئے گئے، جبکہ 5 سال میں پنجاب میں سڑکوں پر 100 ارب روپے خرچ کیے گئے۔کرپشن کے الزامات پر شہباز شریف نے کہا کہ نیب کو چیلنج کرتا ہوں کہ وہ ایک پائی کی کرپشن ثابت کردے جبکہ پاک۔ چین اقتصادی راہداری (سی پیک) کی سرمایہ کاری پر بھی کوئی اعتراض نہیں اٹھا سکتا۔

شہباز شریف

لاہور ( جنرل رپورٹر) پاکستان مسلم لیگ (ن) کے تاحیات قائد اور سابق وزیر اعظم محمد نواز شریف نے اپنے پیغام میں کہا ہے کہ اپنی پارٹی ،اسکے جانثار کارکنوں اورپاکستان کے عوام کاشکر گزار ہوں جو حالات کے تمام تر اتارچڑھاؤ کے باوجود میر ے ساتھ کھڑے رہے ،مجھے کامل یقین ہے کہ ہم تاریخ کی مثبت جانب کھڑے ہیں ، سچ کی جیت ہوگی اورہم یقیناًکامیاب ہوں گے ،ووٹ کو عزت دو محض نعرہ ہی نہیں بلکہ یہ میرے لیے ایمان کا حصہ ہے ، مسلم لیگ (ن) کی سیاست ایک نعرے کے گرد نہیں گھومتی بلکہ یہ ایک مضبوط پاکستان کی تعمیر کے لئے بھرپور جدوجہد کے گرد گھومتی ہے جسے یقینی بنانے کے لئے ہم بھرپور عزم کا اظہار کرتے ہیں،پاکستان اس وقت اہم دوراہے پر کھڑا ہے ،کیا پاکستان کی قسمت کا فیصلہ چند لوگوں کے ایک گروہ کو کرنا چاہیے یا پھر عوام کا حق ہے کہ ووٹ کی طاقت سے اپنی قسمت کا فیصلہ خود کریں مسلم لیگ (ن) کے مرکزی سیکرٹریٹ ماڈل ٹاؤن میں منشور پیش کرنے کی تقریب کے دوران پارٹی قائد کا پیغام مریم اورنگزیب نے پڑھ کر سنایا ۔ اس موقع پر شہباز شریف ، شاہد خاقان عباسی ، احسن اقبال ، سعد رفیق ،حمزہ شہباز ،مشاہد حسین سید ،بلیغ الرحمان ، آصف کرمانی سمیت دیگر بھی موجود تھے ۔ نواز شریف نے اپنے پیغام میں کہا کہ قائد اعظم محمد علی جناح نے 22اپریل 1943ء کو فرمایا تھا کہ جمہوریت ہمارے لہو میں شامل اور ہڈیوں کے گودے میں بھری ہوئی ہے ، جیسا کہ ہم الیکشن 2018ء کے عام انتخابات کے لئے پاکستان مسلم لیگ (ن) کا انتخابی منشور متعارف کرا رہے ہیں میرا ذہن 25سال قبل اپریل 1993ء میں چلا گیا ہے جب میں نے 1973ء کے آئین کو بحال کیا تاکہ پارلیمنٹ کی بالادستی اور ووٹ کی عزت کو یقینی بنایا جا سکے ،کچھ لوگوں کی جانب سے مجھے یہ بھی کہا گیا کہ اس اصول کو اپنانے سے میری بطور وزیرا عظم پوزیشن بھی داؤ پر لگ سکتی ہے تاہم نے نے اس بات کا انتخاب کیا کہ سیاسی قوت ،قانون کی حکمرانی اور جمہوریت کو آئین کے عین مطابق ہونا چاہیے ۔ انہوں نے کہا کہ 17اپریل 1993ء میں قوم سے خطاب کے دوران تمام سازشوں سے متعلق میں نے قوم کو اعتماد میں لیا اور بتایا کہ ایک ادارے میں چند لوگوں کا ایک گروہ حکومت کے خلاف سازشوں میں ملوث ہے اور اپنے حلف کی خلاف ورزی کا مرتکب ہو رہا ہے اور وہ چاہتے تھے کہ قوم کی تقدیر کا فیصلہ عوامی نمائندوں کے بجائے وہ خود کریں ۔ اپنی اس تقریر میں جو کہ اب تاریخ کا حصہ ہے میں کہا تھا کہ میں کوئی ڈکٹیشن نہیں لوں گا ، اس تقریر پر تھوڑی ہی دیر بعد ایک غیر جمہوری آرٹیکل 52(2) بی لاگو کرتے ہوئے صدارتی حکم پر قومی اسمبلی توڑ دی گئی تاہم پاکستانی قوم اس پر رضا مند نہ ہوئی اور آئندہ انتخابات میں مسلم لیگ کو بھاری ووٹ دے کر اعتماد کا اظہار کیا ۔افسوس کہ ہمارے جمہوری راستے کو ایک بار پھر روک دیا گیا ہے اور مجھے وطن عزیز سے جبری طور پر ملک بدر کر دیا گیا ،1993ء کی طرح ہم نے ایک بار پھر بھرپور مزاحمت اور غیر جمہوری قوتوں اور ان کے غیر آئینی اقدامات کو پیچھے کی جانب دھکیل دیا ، 2008ء اور 2013ء کے عام انتخابات میں پاکستانی قوم نے ایک بار پھر مسلم لیگ (ن) پر اعتماد کیا اور پہلے پنجاب اور پھر قومی سطح پر اقتدار میں لے آئی ۔ ہمارے اقتدار کو ابھی ایک سال نہ گزرا تھا کہ ہماری حکومت کو ایک بار پھر سیاسی سازشوں اور محاذ آرائی کا شکار کر دیا گیا ،یہ سب اس وقت ہوا جب ہم نے 5جولائی 2013ء کو سی پیک معاہدے کا اعلان کیا لیکن اس سیاسی محاذ آرائی کے باعث چینی صدر شی جن پنگ کو اپنا دورہ ملتوی کرنا پڑ اور پھر انہوں نے 14سے 17ستمبر 2014تک پاکستان کا دورہ کیا ۔ چین کے صدر کی جانب سے طے شدہ دورے کی منسوخی نے ثابت کردیا کہ یہ دھرنے قومی مفادات کیلئے کس قدر نقصان دہ تھے ۔ انہوں نے کہا کہ سازشوں کا یہ سلسلہ یہاں تک ہی محدود نہیں رہا، پانامہ پیپرز جن میں میرانام تک شامل نہیں تھا کا سہارا لیا گیا اورمن گھڑت 145مقدمہ 146بنایا گیا سب سے پہلے مجھے وزارت عظمی کے منصب سے اور پھر مسلم لیگ (ن) کی منتخب صدارت سے ہٹادیا گیا ۔ یہ ایسے اقدامات تھے جن کی پاکستانی سیاسی تاریخ میں کوئی مثال نہیں ملتی ،میرے تمام اقدامات کو مسترد کردیاگیا حتیٰ کے میرے پارٹی اراکین سے جماعت کے انتخابی نشان کے حصول کا حق بھی چھین لے گیا ۔ نواز شریف نے اپنے پیغام میں کہا کہ 1993کی طرح میں نے ایک بار پھر واضح کردیا کہ جمہوری اصول اورآئین کی بالا دستی میری ذات اور پارٹی سے کہیں بڑھ کر اہم ہے ۔ یہ ایک وفاقی ، پارلیمانی ، جمہوری اوراسلامی جمہوریہ پاکستان کے مستقبل کا سوال ہے ۔ ووٹ کو عزت دو محض ایک نعرہ ہی نہیں بلکہ یہ میرے لئے ایمان کا حصہ ہے ۔ اس نظریے کی بنیاد قیام پاکستان اوربانی پاکستان پر انحصار کرتی ہے پاکستان خود جمہوری عمل کے ذریعے وجود میں آیا ۔ 20ویں صدی کے عظیم ترین رہنماؤں میں سے ایک قائد اعظم محمدعلی جناح آل انڈیا مسلم لیگ جیسی مقبول جماعت کے سربراہ تھے ۔ انہوں نے ووٹ کی طاقت سے ہی آزادی کی جدو جہد کو کامیابی سے ہمکنار کیا اور یوں 14اگست 1947کو دنیا کے نقشے پر ایک آزاد اور خود مختار ملک نمودار ہوا ۔ جب ہم ووٹ کو عزت دو کی بات کرتے ہیں تو دراصل ہم قیام پاکستان کی بات کرتے ہیں جو کہ ووٹ کی طاقت سے وجود میں آیا تاہم ووٹ کی حرمت ، تحفظ اورفروغ کو یقینی بناناہے پاکستان مسلم لیگ (ن) قائداعظم محمد علی جناح کی آل انڈیا مسلم لیگ کی جانشین جماعت ہے اور یہ ہم پر واجب ہے کہ ہم پاکستان میں جمہوریت کے فروغ ،قانون کی حکمرانی ، سیاسی ہم آہنگی ، اقلیتوں کے حقوق کے تحفظ ، خواتین کے احترام اور آئین کی بالا دستی کو یقینی بنائیں ۔ ہمیں یہ ہرگز نہیں بھولنا چاہیے کہ یہ بانی پاکستان کی بہن مادر ملت فاطمہ جناح ہی تھیں جو سب سے پہلے فوجی آمر کے خلاف عوام کی جانب سے اٹھ کھڑی ہوئیں اور اگر 1965کے انتخابات میں دھاندلی نہ ہوتی تو وہ ملک کی پہلی منتخب صد رہوتیں اور پاکستان کبھی بھی تقسیم نہ ہوتا اورآج اسے مشرقی اورمغربی پاکستان دونوں کی بھرپور سپورٹ حاصل ہوتی ۔ انہوں نے کہا کہ میں مسلم لیگ(ن) کے ساتھیوں اور پاکستانی عوام کو یہ کہنا چاہتاہوں کہ مسلم لیگ (ن) کی سیاست ایک نعرے کے گرد نہیں گھومتی بلکہ یہ ایک مضبوط پاکستان کی تعمیر کیلئے بھرپور جدوجہد کے گرد گھومتی ہے ۔جسے یقینی بنانے کیلئے ہم بھرپور عزم کااظہار کرتے ہیں ۔ ملک کے مختلف حصوں میں قومی سلامی سے متعلق تاریخی فیصلے کرنے کا کریڈٹ بھی مسلم لیگ(ن) کو ہی جات ہے جس نے صرف پاکستان کو ایک ایٹمی قوت بنایا بلکہ کراچی میں قیام امن کیلئے تمام تردباؤ کو مسترد کیا جو کئی دہائیوں سے اذیت کاباعث بنا ہوا تھا ۔آپریشن ضرب عضب کا آغاز کیاگیا جس کی مدد سے فاٹا کو دہشت گردوں سے پاک کیا ۔ موٹر ویز کی مدد سے پاکستان میں جدید یت کی راہ ہموار کی گئی جبکہ سی پیک جیسے معاہدوں سے پاکستان کو اکیسویں صدی کے مطابق آگے بڑھا یا گیا ۔ نواز شریف نے اپنے پیغام میں مزید کہا کہ پاکستان اورپاکستان مسلم لیگ (ن) کی قسمت باہم جڑی ہوئی ہیں اور میں اپنی پارٹی اس کے جانثار کارکنوں اورپاکستان کے عوام کاشکر گزار ہوں جو حالات کے تمام تر اتارچڑھاؤ کے باوجود میر ے ساتھ کھڑے رہے ۔ پاکستان اس وقت ایک اہم سنگھم پر کھڑا ہے کیا پاکستان کی قسمت کافیصلہ چند لوگوں کے ایک گروہ کو کرنا چاہیے ۔ سازشی جتھے کو کرناچاہیے یا پھر یہ پاکستان کے عام عوام مرد و خواتین کا حق ہے کہ وہ ووٹ کی طاقت سے اپنی قسمت کا فیصلہ خود کریں ۔ میں مکمل طور پر پر اعتماد ہوں کہ اللہ تعالیٰ کی رحمت سے پاکستان کے عوام گزشتہ پچیس سال میں تیسری بار بھی ایک مقصد کو ہی سپورٹ کریں گے جوکہ پاکستان اور اس کے کروڑوں لوگوں کے روشن مستقبل کا واحد حل ہے ۔مجھے کامل یقین ہے کہ ہم تاریخ کی مثبت جانب کھڑے ہیں ، سچ کی جیت ہوگی اورہم یقیناًکامیاب ہوں گے ۔

نواز شریف

مزید :

صفحہ اول -