جنوبی وزیرستان: کار سے چلتی گاڑی پر فائرنگ،3 افراد جاں بحق

ڈی آئی خان(ڈیلی پاکستان آن لائن )جنوبی وزیرستان میں سیاہ شیشوں والی کار سے چلتی گاڑی پر فائرنگ کے نتیجے میں تین افراد جاں بحق ہو گئے۔
پولیس حکام کے مطابق ڈی آئی خان میں جنوبی وزیرستان کی تحصیل برمل کے علاقے راغزائی کے قریب کالے شیشے والی فیلڈ کار سے فائرنگ کرنے کا واقعہ پیش آیا ہے، جس کے نتیجے میں ڈارئیور سمیت 3 افراد موقع پر جاں بحق ہو گئے۔
ڈی پی او آصف بہادر نے بتایا کہ فائرنگ چلتی کارگو گاڑی پر کی گئی ہے جس کا نشانہ بننے والے تینوں کا افراد کا تعلق وزیر گنگی خیل قبائل سے ہے۔
فائرنگ کے واقعے کی وجوہات کا تاحال علم نہیں ہو سکا۔ پولیس نے جائے وقوعہ سے شواہد اکٹھے اور علاقے کی ناکہ بندی کرکے واقعے کی تحقیقات شروع کردی ہیں۔
دریں اثنا ضلع بنوں میں تھانہ وزیر کی حدود سے 3 لاشیں برآمد ہوئی ہیں، جنہیں شناخت کے لئے ڈسٹرکٹ ہیڈ کوارٹر ہسپتال منتقل کردیا گیا۔اس حوالے سے پولیس کا کہنا ہے کہ ابتدائی طور پر لاشوں کی شناخت نہیں سکی۔
پولیس کے مطابق لاشیں ممند خیل کے علاقے کندے چیک پوسٹ کے ساتھ پڑی تھیں، نامعلوم ملزمان نے تینوں لاشیں رات کے وقت پھینکی ہیں۔