وزیراعلیٰ پنجاب کا پولیس کو بلٹ پروف گاڑیاں، جیکٹس اور خصوصی ٹریننگ دینے کا حکم
لاہور(ڈیلی پاکستان آن لائن ) وزیراعلیٰ پنجاب مریم نواز نے پولیس اہلکاروں کو بلٹ پروف جیکٹس اور گاڑیاں دینے کا حکم دیا ہے۔
نجی ٹی وی" جیو نیوز" کے مطابق وزیراعلیٰ پنجاب مریم نواز کی زیر صدارت امن وامان سے متعلق امور کا جائزہ اجلاس ہوا جس میں جہاں وزیراعلیٰ نے عید میلادالنبی ﷺپرفول پروف سکیورٹی انتظامات کرنے اور پولیس افسران کو علمائے کرام کے پاس جاکر ملاقات کرنے کی ہدایت کی۔
اجلاس میں صوبائی سرحدی چوکیوں کی تعداد بڑھانے کی تجویز سامنے آئی جبکہ اس موقع پر وزیراعلیٰ نے پولیس اہلکاروں کو بلٹ پروف گاڑیاں اور بلٹ پروف جیکٹس فوری دینے کا حکم دینے کا حکم بھی دیا، اجلاس میں پولیس کو 1 ارب روپے کی گرانٹ دینے کی منظوری بھی دی گئی۔
مریم نواز نے سرحدی پوسٹوں پر تعینات پولیس اہلکاروں کو خصوصی ٹریننگ کرانے، بارڈر سیکیورٹی چیک پوسٹوں کو مزید مضبوط اور بہتربنانے اور غیرقانونی اسلحہ کے خاتمے کے لیے مہم مزید تیز کرنے کا حکم بھی دیا۔
اجلاس میں آن ڈیوٹی پولیس اہلکاروں کے سوشل میڈیا کے استعمال پر پابندی عائد کرنے کا فیصلہ بھی کیا گیا۔وزیراعلیٰ پنجاب نے کہا کہ عوام کے تحفظ کے لئے جو کچھ بھی کرنا پڑا ضرور کیا جائے گا، جرائم پیشہ اور سماج دشمن عناصر کے خلاف بلا امتیاز کارروائی کی جائے، پولیس جرم سرزد ہونے کا انتظار کیے بغیر پیشگی ایکشن کی اہلیت پیدا کرے۔
مریم نواز کا کہنا تھا کہ پولیس چیک پوسٹوں پر حملہ کرنے والوں کو ایسا سخت جواب دیں کہ آئندہ حملے کی جرأت نہ کریں، پولیس چیک پوسٹوں کے درمیان پولیس پیٹرولنگ کا انتظام کیا جائے۔
