پیکٹا کے زیر اہتمام گلوبل سٹیزن شپ ان ایجوکیشن کانفرنس کل شروع ہوگی ، ملکی و غیر ملکی ماہرین تعلیم شرکت کریں گے
لاہور ( ڈیلی پاکستان آن لائن )پنجاب ایجوکیشن کریکولم ٹریننگ اینڈ اسسمنٹ اتھارٹی (پیکٹا) کے زیر اہتمام پروموٹنگ گلوبل سٹیزن شپ ان ایجوکیشن کے موضوع پر 4 روزہ کانفرنس 14 سے 17 اپریل تک پیکٹا ہیڈ آفس آڈیٹوریم وحدت روڈ لاہور میں ہوگی۔ کانفرنس محکمہ سکول ایجوکیشن، یونیسکو، ایشیا پیسیفک سنٹر آف ایجوکیشن فار انٹرنیشنل انڈرسٹینڈنگ اور پنجاب ایجوکیشن کریکولم ٹریننگ اینڈ اسسمنٹ اتھارٹی (پیکٹا) کے اشتراک سے منعقد ہوگی۔
چیف ایگزیکٹو آفیسر پیکٹا ڈاکٹر شہنشاہ فیصل عظیم نے کہا ہے کہ کانفرنس میں گلوبل سٹیزن شپ ان ایجوکیشن کو فروغ دینے کے موضوعات کا احاطہ کرنے کیلئے بین الاقوامی ماہرین بشمول پروفیسر کیون اینڈریو جیسن کیسٹر (سیول نیشنل یونیورسٹی)، ڈاکٹر کیون ایستھر کیئر (یونیورسٹی آف میلبورن)، لیہ ایسپالارڈو (پی ٹی اے) کے علاوہ کورین ماہرین تعلیم ایوم جیونگمین اور کم ہیسو (یونیسکو ایشیا پیسیفک سنٹر آف ایجوکیشن فار انٹرنیشنل انڈرسٹینڈنگ) شریک ہوں گے جو موضوعات کے مختلف پہلوؤں کو سمجھنے اور ان کی صلاحیتوں کو مؤثر طور پر بڑھانے کے لیے شرکاء کی پیشہ ورانہ تربیت کریں گے۔
سی ای او پیکٹا ڈاکٹر شہنشاہ فیصل عظیم نے اس ورکشاپ کو اقوام متحدہ کے پائیدار ترقی کے ہدف 4.7 کے تحت تعلیم میں عالمی شہریت کو فروغ دینے کے 3 سالہ منصوبے (2024-2026) کا ایک حصہ قرار دیتے ہوئے کہا ہے کہ یہ 4 روزہ پروموٹنگ گلوبل سٹیزن شپ ان ایجوکیشن کانفرنس اپنی نوعیت کی منفرد تعلیمی کانفرنس ہوگی جس کے ذریعے تعلیم میں پائیدار ترقی و طرز زندگی، انسانی حقوق، صنفی مساوات، عالمی شہریت اور ثقافتی تنوع کی اہمیت کو اجاگر کیا جائے گا۔
انہوں نے کہا کہ نامور ماہرین تعلیم 14 اپریل کو ہونے والے افتتاحی اجلاس میں شریک ہوں گے جبکہ صوبائی وزیر تعلیم رانا سکندر حیات اختتامی تقریب میں مہمان خصوصی شرکت کریں گے۔
