فائنل میچ میں پاکستانی باؤلرز کی شاندار باؤلنگ دیکھ کر بھارتی کمنٹیٹر تعریف کیے بغیر نہ رہ سکے
نئی دہلی(ڈیلی پاکستان آن لائن)بھارت سے تعلق رکھنے والے معروف کرکٹ کمنٹیٹر ہرشا بھوگلے نے پاکستان ٹیم کی باؤلنگ کو دنیا کی بہترین باؤلنگ قرار دے دیا۔اپنے ٹوئٹر پیغام میں بھارتی کرکٹ کمنٹیٹر ہرشا بھوگلے نے کہا کہ ’سارا کریڈٹ پاکستان کو جاتا ہے، بہت کم ٹیموں نے137 رنز کے ہدف کے جواب میں ایسا مقابلہ کیا‘۔
آئی سی سی ٹی ٹوئنٹی کرکٹ ورلڈکپ کے فائنل میں پاکستان نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 137 رنز بنائے۔ پاکستان کے باؤلرز نے اپنی تباہ کن بولنگ کے ذریعے آسان ہدف کو انگلینڈ کے لیے مشکل بنادیا اور انگلینڈ کی ٹیم 19ویں اوور کی آخری گیند پر اسے بمشکل حاصل کر پائی۔
انگلینڈ نے 138 کے ہدف کا تعاقب شروع کیا تو شاہین شاہ آفریدی نے اپنے پہلے ہی اور میں ایلکس ہیلز کی وکٹیں اڑا دیں، 7 رنز پر پہلی وکٹ گرنے کے بعد انگلینڈ کی ٹیم کو سنبھلنے میں تھوڑا وقت لگا۔جس کے بعد چوتھے اور چھٹے اوور میں حارث رؤف نے انگلینڈ کے 2کھلاڑیوں کو آؤٹ کیا تو حریف ٹیم پریشر میں آگئی۔
پاکستان کی جانب سے حارث رؤف نے دو وکٹیں حاصل کیں، شاہین شاہ، شاداب اور محمد وسیم بھی ایک ایک وکٹ لینے میں کامیاب ہوئے۔پاکستانی بولرز نے انگلینڈ کو مشکل میں ڈال دیا تھا جس کا اعتراف معروف کرکٹ کمنٹیٹر ہرشا بھوگلے نے بھی کیا اور کھل کر ان کی تعریف کی۔
