پی پی 193 پاکپتن ، ن لیگ کا بشریٰ بی بی کے داماد کی جگہ فاروق مانیکا کو ٹکٹ دینے پر غور
پاکپتن(ڈیلی پاکستا ن آن لائن)مسلم لیگ (ن) نے پنجاب اسمبلی کے حلقہ پی پی 193 پاکپتن سے سابق خاتون اول بشریٰ بی بی کے داماد میاں حیات مانیکا کی جگہ فاروق مانیکا کو ٹکٹ دینے پر غور شروع کردیا۔
جیو نیوز کے مطابق میاں حیات مانیکا سابق وزیر عطا مانیکا کے بیٹے اور بشریٰ بی بی کے داماد ہیں، میاں حیات مانیکا نے 2018 میں ن لیگ کے ٹکٹ پر الیکشن میں حصہ لیا تھا جبکہ فاروق مانیکا ن لیگ کا ٹکٹ نہ ملنے پر الیکشن میں آزاد امیدوار کھڑے ہوئے تھے۔فاروق مانیکا کی پارٹی سے ناراضی ختم ہوگئی ہے اور سابق وفاقی وزیر رانا ثنا اللہ کے ساتھ پریس کانفرس میں آئے۔
فاروق مانیکا ن لیگ کے سابق ایم این اے رضا مانیکا کے بھائی ہیں۔اس حوالے سے رانا ثنا اللہ کا کہنا تھاکہ ن لیگ کے ٹکٹ ہولڈر میاں حیات مانیکا نے ن لیگ سے رابطہ نہیں رکھا، 2018 کے الیکشن میں فاروق مانیکا جیتے لیکن صبح 100 ووٹ سے ہار گئے تھے۔انہوں نے کہا کہ اس حلقے میں فاروق مانیکا بھی مضبوط امیدوار ہیں۔دوسری جانب عطا مانیکا کا کہنا ہے کہ ٹکٹ کیلئے درخواست دینے کی تاریخ 20 نومبر ہے، الیکشن لڑنا ہے اور ٹکٹ کا فیصلہ ہونے پر لائحہ عمل اختیار کریں گے۔
