بے وقار اس نے کیا  منہ میں نوالہ دے کر۔۔۔

میری قسمت میں اندھیرا ہے اجالا دے کر 
سب نے لوٹا ہے محبت کا حوالہ دے کر

میں نے یہ اس سےکہا دنیا مجھے دیکھنی ہے
نوچ لیں آنکھیں مری ہاتھوں میں پیالہ دے کر

اس نے عزت سے مرے سامنے روٹی رکھی
بے وقار اس نے کیا  منہ میں نوالہ دے کر

سامنے لاش رکھی بیٹے کی اور پرسہ دیا 
لوگ پھر چلتے بنے ماں کو سنبھالا دے کر

تیری ہر یاد کے مسکن کا بدل تھا ہی نہیں
میں نے تو فرض نبھایا تھا ازالہ دے کر

میری نظروں میں مکرم ہے وہی شخص منال
جس نے سر ڈھانپا محبت سے دوشالہ دے کر

کلام :ثمینہ رحمت منال