عثمان بزدار نے وی آئی پی فلائٹس کے لئے 2 کروڑ 21 لاکھ روپے کے اضافی فنڈز مانگ لیے

لاہور (ڈیلی پاکستان آن لائن) حکومت کی جانب سے چلائی جانے والی سادگی مہم کی دھجیاں اس وقت اڑ گئیں جب وزیر اعلیٰ پنجاب سردار عثمان بزدار نے وی آئی پی فلائٹس کے لئے 2 کروڑ 21 لاکھ روپے کے اضافی فنڈز مانگ لیے۔
نجی ٹی وی ایکسپریس نیوز کے مطابق وزیر اعلیٰ پنجاب نے نہ صرف ہیلی کاپٹر اڑانے کیلئے 2 کروڑ 21 لاکھ روپے کے اضافی فنڈز مانگے ہیں بلکہ کل (منگل کو) صوبائی ذیلی کابینہ برائے خزانہ کا اجلاس بھی طلب کر لیا ہے۔ صوبائی ذیلی کابینہ برائے خزانہ کے اجلاس میں وی آئی پی فلائٹس کے لئے 2 کروڑ 21 لاکھ روپے کی سپلیمنٹری گرانٹ کی منظوری دی جائے گی۔
محکمہ سروسز اینڈ جنرل ایڈمنسٹریشن ڈیپارٹمنٹ کے کیبنٹ ونگ کی جانب سے اجلاس طلب کرنے کا نوٹیفکیشن جاری کر دیا گیا ہے۔واضح رہے کہ رواں مالی سال حکومت پنجاب نے وزیراعلیٰ کے سفر کے لیے 14 کروڑ 67 لاکھ روپے مختص کیے ہیں لیکن یہ اضافی فنڈز مختص کردہ فنڈز سے الگ مانگے گئے ہیں۔