کیا زیادہ ہنسنے سے بھی کسی کی موت ہوسکتی ہے؟ وہ 3 لوگ جو ہنس ہنس کر مرے
نئی دہلی (ڈیلی پاکستان آن لائن) ہنسی عام طور پر صحت کے لیے مفید سمجھی جاتی ہے لیکن بعض اوقات بے قابو اور حد سے زیادہ ہنسنا جان لیوا بھی ثابت ہو سکتا ہے۔ اگرچہ ایسے واقعات بہت کم اور نایاب ہوتے ہیں، لیکن تاریخ میں تین مشہور شخصیات ایسی ہیں جن کی موت ہنسنے کے دوران ہوئی۔ زیادہ ہنسنے سے جسم میں مختلف جسمانی ردعمل پیدا ہو سکتے ہیں جو بعض اوقات خطرناک ثابت ہو سکتے ہیں۔ شدید ہنسی دل کی دھڑکن تیز کر سکتی ہے اور سانس لینے میں دقت پیدا کر سکتی ہے، جو بعض اوقات دل کے دورے یا فالج کا سبب بن سکتی ہے۔
1. کریسیپس: ایک یونانی فلسفی جو ہنسی سے چل بسا
کریسیپس جو 279 سے 206 قبل مسیح کے دوران یونان میں رہتے تھے، ایک مشہور فلسفی تھے اور سٹوئک فلسفے کے بانیوں میں شمار کیے جاتے ہیں۔ ان کی موت ایک عجیب و غریب واقعہ ہے۔ کہا جاتا ہے کہ وہ ایک گدھے کو شراب پیتے دیکھ کر اتنی شدت سے ہنسے کہ ان کی موت واقع ہو گئی۔ایک روایت کے مطابق انہوں نے گدھے کو انجیر کھاتے دیکھا اور مذاق میں کہا کہ اسے بغیر ملاوٹ کی شراب بھی دو۔ یہ منظر ان کے لیے اتنا مضحکہ خیز تھا کہ وہ بے قابو ہو کر ہنستے رہے اور بالآخر دم توڑ دیا۔
2. ایلکس مچل: ٹی وی پر مزاحیہ پروگرام دیکھتے ہوئے ہنس کر چل بسے
انگلینڈ کے رہائشی تھے، 24 مارچ 1975 کو بی بی سی کے پروگرام "دی گڈیز" دیکھتے ہوئے ہنسی کے دوران دل کا دورہ پڑنے سے انتقال کر گئے۔ یہ واقعہ تب پیش آیا جب وہ 25 منٹ تک مسلسل ہنستے رہے، جس کے نتیجے میں ان کا دل فیل ہو گیا۔
3. اولے بینٹزن: ایک مزاحیہ فلم دیکھتے ہوئے ہنس ہنس کر موت کا شکار
ڈنمارک کے 71 سالہ اولے بینٹزن 1989 میں "اے فش کالڈ وانڈا" نامی مزاحیہ فلم دیکھتے ہوئے جان سے ہاتھ دھو بیٹھے۔ ایک مزاحیہ منظر نے ان کی ہنسی کو اتنا بڑھا دیا کہ ان کی دل کی دھڑکن 250 سے 500 فی منٹ تک پہنچ گئی، جس سے انہیں دل کا دورہ پڑا۔
نیوز 18 کے مطابق ہنسی سے موت کے واقعات انتہائی نایاب ہیں، لیکن بعض صورتوں میں بے قابو ہنسی خطرناک ہو سکتی ہے، خاص طور پر اگر:
دل کی دھڑکن بہت تیز ہو جائے (ٹاکی کارڈیا)
سانس رک جائے یا آکسیجن کی کمی ہو جائے
بلڈ پریشر اور دل کی دھڑکن کم ہو (ویزو ویگل ریفلیکس)
دماغ کی شریان پر دباؤ بڑھے (اسٹروک)
