گالیاں دینے پر مزدور نے مالکن کو قتل کردیا، لاش پر کودنے کی ویڈیو بھی بنالی

نئی دہلی (ڈیلی پاکستان آن لائن)  ایک 75 سالہ خاتون کو اس کے گھر میں ایک مزدور نے قتل کر دیا جس نے بعد میں اس کی لاش پر کودنے کی ویڈیوبھی  ریکارڈ کی۔یہ واقعہ 11 اپریل کو حیدر آباد دکن کے  کوشائی گوڈا میں پیش آیا جس کا پتہ پیر کو اس وقت چلا جب نوجوان نے یہ ویڈیو مقتولہ کے رشتہ دار کے ساتھ شیئر کی ۔پولیس کے مطابق نوعمر لڑکا خاتون کی ملکیت میں موجود ایک دکان پر کام کرتا تھا، جس نے مبینہ طور پر لوہے کی سلاخ سے اس کے سر پر وار کر کے قتل کیا۔

پریس ٹرسٹ اف انڈیا کے مطابق خاتون کو قتل کرنے کے بعد اس نے اس کی گردن میں ساڑھی لپیٹ کر پنکھے سے باندھ دی۔ پھر اپنے فون پر ویڈیو بنا کر اس کی لاش پر کودتا رہا۔اس کے بعد لڑکا گھر کو تالا لگا کر چلا گیا اور بعد میں یہ ویڈیو خاتون کے رشتہ دار کو بھیج دی۔ پولیس  پیر کو ویڈیو کے بارے میں اطلاع ملنے پر گھر کا تالا توڑ کر اندر داخل ہوئی تو خاتون کی سڑی ہوئی لاش ملی۔ پولیس کے مطابق لڑکے کو خاتون کے خلاف شکایت تھی کہ وہ اسے گالیاں دیتی تھی۔ تاہم پولیس تمام پہلوؤں کی جانچ کر رہی ہے۔