برطانیہ میں قرآن پاک جلانے کی ناکام کوشش کرنے والے پر حملہ ، شدید زخمی
لندن (ڈیلی پاکستان آن لائن )لندن میں ترک قونصل خانے کے باہر قرآن پاک کو نذر آتش کرنے والے پر ایک راہگیر نے چاقو سے حملہ کر دیا۔
روز نامہ امت نے عالمی خبر رساں ادارے کے حوالے سے بتایا کہ برطانیہ میں ترک سفارت خانے کے سامنے ایک بدبخت احتجاج کے نام قرآن پاک کو جلانے کے ناپاک ارادے سے آیا تھا۔
جس دوران وہ یہ مکروہ حرکت کرنے جا رہا تھا راہگیروں میں سے ایک نے اس پر حملہ کرکے ا±سے گرا دیا۔ راہگیر نے زمین پر گرے بدبخت شخص کے ہاتھ سے قرآن لے لیا اور اس پر گھونسوں اور لاتوں کی برسات کردی۔
سوشل میڈیا پر وائرل ویڈیو میں دیکھا جا سکتا ہے کہ بدبخت شخص کے ہاتھ میں ایک بڑی کتاب ہے جو قرآن پاک ہے اور اس کا کچھ حصہ جل رہا ہے۔
ویڈیو میں راہگیر کو ملعون شخص پر چاقو سے حملہ کرتے ہوئے بھی دیکھا جا سکتا ہے جس میں بدبخت شدید زخمی ہوگیا۔
پولیس اہلکاروں نے بدبخت کو مشتعل ہجوم سے بچایا اور ایمبولینس کے ذریعے ہسپتال منتقل کیا جہاں اس کی حالت خطرے سے باہر بتائی جا رہی ہے۔
پولیس نے چاقو سے حملہ کرنے والے شخص کو بھی حراست میں لے لیا جس سے پوچھ گچھ کی جا رہی ہے۔پولیس کی جانب سے ملعون اور اس پر حملہ کرنے والے شخص کی شناخت ظاہر نہیں کی گئی۔
