لاہور، فتنہ الخوارج کی پنجاب میں نوجوانوں کی آن لائن بھرتی مہم کا انکشاف

لاہور (آئی این پی)فتنہ الخوارج کی پنجاب میں نوجوانوں کی آن لائن بھرتی مہم کا انکشاف ہوا ہے، قانون نافذ کرنے والے اداروں نے بروقت کارروائی کرکے نیٹ ورک توڑ دیا۔

میڈیا رپورٹ کے مطابق فتنہ الخوارج کی آن لائن بھرتیوں کی وزیراعلی کو بھجوائی گئی تفصیل کے مطابق دہشتگرد تنظیم نے گوجرانوالہ، لاہور، ساہیوال، بہاولپور، جہلم اور سرگودھا سے بھرتیاں کیں۔رپورٹ کے مطابق کالعدم تنظیم نے پنجاب میں مقامی سہولت کاری کیلئے بھرتیاں کیں۔قانون نافذ کرنے والے اداروں نے سائبر پٹرولنگ اور انٹیلی جنس انفارمیشن پر آن لائن بھرتی مہم نیٹ ورک بریک کیا۔

رپورٹ کے مطابق فتنہ الخوارج کی سہولت کاری کیلئے بھرتی ہونے والے 6 افراد گرفتار کیے گئے،گرفتار افراد کی عمریں 16 سے 23 سال کے درمیان ہیں۔رپورٹ میں کہا گیا کہ سائبر پٹرولنگ کے دوران ریاست مخالف عناصر کی مانیٹرنگ کا عمل تیز کردیا گیا ہے، سوشل میڈیا صارفین تک رسائی کرنے والے الگورتھم کی نشاندہی کی جارہی ہے۔