خواجہ آصف نے عمران خان کی سابقہ اہلیہ جمائما گولڈ سمتھ کے ٹویٹ پر زور دار جواب دیدیا
لاہور (ڈیلی پاکستان آن لائن )بانی پی ٹی آئی عمران خان کی سابقہ اہلیہ جمائما گولڈ اسمتھ کی ٹوئٹ پر وزیردفاع خواجہ آصف نےکہا ہے کہ بانی پی ٹی آئی کے ساتھ مستقل طور پر نرمی برتی گئی۔
تفصیلات کے مطابق جمائما گولڈ اسمتھ نے سوشل میڈیا پلیٹ فارم ایکس پر جاری بیان میں عمران خان کی حفاظت اور صحت پر تشویش کا اظہار کیا تھا۔اس پر خواجہ آصف نے جمائما کو جواب دیتے ہوئے کہاکہ عمران خان کے ساتھ مستقل طور پر نرمی برتی گئی، اس شخص نے اپنے مخالفین کے لیے کبھی نرمی نہیں دکھائی تھی۔
وزیر دفاع کا کہنا تھا کہ نوازشریف کو اپنی مرتی ہوئی اہلیہ سے فون پر بات کرنے کی اجازت تک نہیں دی گئی تھی جب کہ اپوزیشن کے متعدد رہنماؤں کو بغیر کسی الزام کے جیل میں رکھا گیا تھا۔
دوسری جانب خواجہ آصف نے برطانوی صحافی پئیرز مورگن کو جواب میں کہا کہ پئیرزکو غزہ میں نسل کشی، صہیونی جیلوں میں ہزاروں فلسطینی یرغمالیوں کی حالت پر کوئی خوف نہیں، وہ پاکستان میں ایک سزا یافتہ قیدی کے معاملے پر ناراض ہیں۔
خواجہ آصف نے مزید کہا کہ یہ میئر کےلیے صیہونی گولڈ اسمتھ کی حمایت کا ثمر ہے۔یاد رہے کہ پئیرز مورگن نے بانی پی ٹی آئی سے متعلق جمائمہ کا ٹویٹ شیئر کرکے آواز اٹھانے کا مطالبہ کیا تھا۔
